South African president hlui, Jacob Zuma-a kar hmasaa police hnena man tura a inpek hnua an ram chhung hmun hrang hranga buaina chhuakah mi 30 vel an thi tawh.
Ningani kal taa Zuma-a tantir a nih atanga amah thlawptuten duh lohna an lantir kal zelah mi 800 dawn man an ni tawh.
A tira president hlui man duh lohna lantir pangngai chu kartawp atang khan tharum thawhnaah a chang tan a. Thil hal te, kawngpui dan leh sumdawnna hmun rawkte a hluar chho hle.
Khawlaia buaina chhuak hmet mit turin police chauhvin an tlin tak loh avangin sipaite pawh koh luh hial an ni tawh.
Police Minister Bheki Cele chuan hetianga thil rawkna a thleng chhunzawm reng a nih chuan nakin lawkah mipui ni tin mamawh chu a bo duak dawn niin Thawhlehnia thuthar lakhawmtute a kawmnaah a sawi.
Hetih lai hian Defence Minister Nosiviwe Mapisa-Nqakula chuan KwaZulu-Natal leh Gauteng province-a tharum thawhna thleng avanga emergency puan erawh a la tul lo niin a sawi.
KwaZulu-Natal Premier Sihle Zikalala chuan an province-ah hian mi 26 vel an thi tawh niin a sawi a, an zingah hian mipa naupang kum 15 mi pawh a tel tih a sawi tih EWN chuan a tar lang a. Gauteng-ah mi paruk an thi tawh bawk niin news agency AFP chuan a tar lang bawk.
Thuneitute chuan Zuma-a lung in tantir duh lohna lantir hi mi sual thenkhatin remchangah lain thil sual tih nan an hmang niin an sawi a. Mi dangte erawh chuan hna nei lo tam lutuk leh retheihna nasa lutuk chuan mi a tithinur zual niin an sawi ve bawk.
Cele chuan tharum thawhna thlengah hian mi 12 chhui mek an nih thu a sawi.
Online lamah chanchinthar dik lo nasa taka thehdarh chuan buaina a tipunlun zual bawk a. Rorel lai, African National Congress (ANC) chuan Zuma fanu, Duduzile Zuma-Sambudla-in Twitter-a a thu tar lan pawh an chhui zui dawn tih an sawi.
“A thil tar lan chungchang hi a sawi fiah ang a, engnge a sawi tum leh khawi lamah nge mi hruai a tum tih hi kan hriat a ngai,” tiin an party-a deputy secretary-general, Jesse Duarte chuan South Africa-a chanchinbu lian, Daily Maverick hnenah a sawi.