Europe chhim lam leh Africa hmarthlang lam chu khaw lum uchuak takin a tuam mek a, khaw lum ber record thar a awm ngei rin a ni.
Spain, France, Greece, Croatia leh Turkey hmun thenkhatah chuan 40°C kai ngei tura ngaih a ni.
Italy-ah phei chuan 48.8°C a kai tawh a. Rome, Bologna leh Florence telin khawpui 10-ah red alert warning tihchhuah a ni.
Thawhlehni khan Italy hmar lamah pa pakhat, kum 40 chuang chu khaw lum lutuk avang hian a thi.
Italian chanchinbute chuan kum 44 mi hi Milan khawpui bula Lodi khuaah zebra crossing line siam lai a ni a, rei tak ni sa a tawrh hnuah a tlu niin an tar lang a. Damdawi ina hruai a nih hnuah a thi.
“Khaw lum uchuak takin min tuam mek a ni,” tiin Italian politician Nicola Fratoianni chuan Twitter-ah a tar lang.
Mipuite chu ni khatah tui litre hnih tal in tur leh coffee leh zu in lo turin an ngen.
Rome khawpuia khualzin pawl khat chuan khawlaia tui chik an siamte leh thermal water te chu intihdaih nan an hmang tih an sawi.
“Dam chhuah hram kan tum a ni,” tiin chhim lam khawpui, Bari tlawhtu Mariko Desso chuan a sawi.
Italy thlawhtu tam tak chu khaw lum lutuk avangin an tlu nual a, heng zingah hian British pa pakhat, Colosseum, Rome bula tlu pawh a tel.
Italian Meteorological Society-in Cerberus heatwave tia an sawi hi Dante-a lehkhabu, inferno-a ramhuai lu pathum nen hming chawia an phuah a ni a, ni rei vak lo chhung khaw lum hian a la tuam dawn niin an sawi.
Spain-ah pawh hmun tam tak chu 45°C chung lam a ni a, zan lamah pawh 25°C hnuaiah a tla hleithei lo bawk a. Copernicus Sentinel mission-in thlalem thlalak an tihchhuaha a lan dan chuan Extremadura region-ah chuan Thawhlehni khan 60°C a kai hial.
“Khua hi a lum zel a, a lum telh telh a; mahse, kum dang zawng zawng aiin a lum a ni,” tiin Madrid-a cheng, Alejandrina Coy chuan Reuters a hrilh a. “Mi tin hian an tuar a ni,” a ti.
Met Office chuan khaw lum lam hi Zirtawpniah a san lai ber a thleng dawn niin an sawi a, BBC Weather pawhin Europe chhim lam zawng chu 40°C chung lam a ni dawn niin an sawi lawk a, a ai pawhin a lum thei niin an sawi.
Khaw lum hian kartawp thleng a la awh dawn niin a lang a, Czech khawpui, Prague-ah pawh Inrinni hian 36°C a kai dawn niin BBC Weather an sawi a, July lum lam chawhrual hi 24°C a ni dawn niin an sawi.
Cerberus hi a zawh hnuah pawh Italian weather forecaster-te chuan khaw lum uchuak dang, Charon an tih chu a thleng leh dawn niin an sawi lawk a. Hei hian Rome khawpui chu 43°C leh Sardinia thliarkar chu 47°C thleng a ni thei dawn niin an sawi.