India khawpui, Delhi chu Yamuna atanga luang liam tui tam takin luan luh avangin kawngpui pawimawh tak takte a chim a, nunphung a tibuai hle.
Yamuna tui chim chin hi Nilaini atang khan a sang chak hle a, tunah hian kum 45 chhunga a chim san lai ber a tawng tawh.
Thuneitute chuan hmun hniam laia chengte chu a senghawi tawh a, lirthei kal vel dan pawh a thlak kual nasa hle.
India-ah hian hmar lam hmun zau tak chuan fur ruah tui tam tak an dawng mek a, state dangah pawh chhiatna a thlen nual tawh.
Himachal Pradesh-ah ringawt pawh mi 88 thi an awm tawh a. Punjab leh Haryana-ah pawh tui a lian nasa hle bawk.
Ningani zingah khan Yamuna chim chin hi a hma nia metre 207.49 atangin 208.46-ah a cho va, hei hi kum 45 chhunga a chim san lai ber niin thuneitute chuan an sawi.
Tui hi a kuang atanga luang liamin hmun hniam lai leh kawngpui a chim nasa hle a. Social media-a video thehdarhah pawh car leh bus-te chu khaw laiah tuiin a chimin an dang nasa hle tih a lang.
Tual chhung TV channel-te pawhin Chief Minister Arvind Kejriwal-a chenna in kawtah tui tam tak tling pawh an tilang a. PTI news agency pawhin Delhi lailia sumdawnna hmunpui, Connaught Place panna kawngpuite pawh tuiin a chim tih an tar lang bawk.
Kejriwal-a hian Ningani khan sikul, college leh university te chu Pathianni thleng khar a ni dawn tih thuthar lakhawmtute hnenah a sawi a. Sorkar hnathawkte pawh, ni tin mamawh lam buaipui chi lote chu an in atanga hna thawk tura tih an ni bawk tih a sawi.
“Mi mal pisate pawh in lam atanga thawk tura ngen an ni,” a ti bawk.
Tui a len nasat avang hian Delhi-a water treatment plant pathum pawh khar a ni rih a. Kejriwal-a chuan tui hi renchem taka sem a ngaih rih dawn avangin ni rei vak lo chu tui a harsat phah dawn niin a sawi.
Lirthei lian chi, ni tin mamawh phur tih loh chu pawn lam atanga Delhi-a luh phalsak rih loh an ni.
Mi 16,000 chuang relief tent-ah suan chhuah niin heng mite hi kawng chhawng hnuaiah sorkarin a dah rih mek.
Disaster relief team tam tak sem darh niin tui lenna hmunah mi chhanchhuah leh chhawmdawl hna an thawk mek.
Nilaini khan Kejriwal-a hian sorkar laipui hnenah Haryana-a Hathnikund Barrage atanga tui tihchhuah chu titawp rih turin a lo ngen tawh a, hei hian Yamuna tui hi a titam zual hle niin a sawi.
Thuneitute pawhin tuikhuah atanga tui tihchhuah hi Ningani chawhnu dar 2:00 atang khan tihtlem hret hret a nih thu leh tui lian pawh a tihziaawm thuai an beisei tih an sawi.
State governor leh Kejriwal-a te hian Ningani vek khan Delhi Disaster Management Authority chu tui lian chungchang sawipuiin an hmu bawk.