AIZAWL: National Trade Union of Mizoram (NTUM) chuan Mizoram sorkara council of ministers-in a lo pawm tawh The Shop & Establishment Act chu a taka kalpui a nih nan notification tihchhuah vat an duh.
Nimina Aizawl Press Club-a thuthar thehdarhtute an kawmnaah an pawl president C Remtluanga chuan, May 18, 2023-a cabinet thukhawmin a pass ‘The Shop & Establishment Act’ chu notification chhuah a la ni lo tih sawiin, “He dan hi a taka hman a nih theih nan notification chhuah thuai se kan duh,” a ti.
C Remtluanga chuan muster roll/casual te hlawh pun nan sorkarin Minimum Wages Act 1948 a ennawn hnua cabinet-in a pawma notification a tichhuak erawh lawmawm an tih thu a sawi.
NTUM president chuan kum 2020 khan MR sang riat chuang zet chu sorakrin NTUM ngenna ngin provisional employee ah a hlang kai tawh tih an sawi a, tunah hian sorkar record-ah MR hi 3,365 an la awm mek tih leh MR-a awm mekte chu provisional employee an nih ve theih nan sorkarah dil a, an bawhzui mek thu a sawi.
C Remtluanga chuan, NTUM-in hnathawktu dinhmun hniam zawk MR, casual employee leh private establishment hnuai thawkte chanvo hum him theih nan labour court din an lo ngen tawh thin tih sawi bawkin, kum 10 hma lam khan labour court din hi kan lo nawr tawh a, he thil hi tih hlawhtlin ni thei se kan duh hle, a ti bawk.