Aizawl: Mizoram Pradesh Youth Congress Committee (MPYCC) chuan Cabinet Minister leh Kolasib bialtu MLA ni bawk, K. Lalrinliana’n Kolasib-a jounalist-te chu tan bik nei, an awmna party nen lam a hriat vek thu a sawi chu pawi an tih thu leh a rang thei ang bera ngaihdam dil turin an phut.
Nimina thuchhuah an siamah MPYCC chuan July 12, 2023-a KVK, Kolasib ram theh tum an ennaah K Lalrinliana’n Mizoram Journalist Association, Kolasib District-te chu tan bik nei (bias)-ah a puh leh an awmna party nen lam a hriat vek thu a sawi bakah, an awmna party hming ni awma a hriatte a sawi chhuak duh hial chu mak an tiin, pawi an tih thu an sawi.
MPYCC chuan Mizoramin Minister leh MLA a lo neih tawh te zingah, Mizoram Journalist te’n thudik leh thil dik hai lang tura hma an lak na kawngah, mawi lo leh dik lo taka tawng khum a sawichhe duh tu hi an awm an la hriat ngai loh thu an sawi a. “Kolasib bialtu MLA Pu K. Lalrinliana hian a tih loh tawp tur a tih bakah, KVK, Kolasib ram theh tum chungchangah hian dik lo taka thil tih tum a nei tih a ti lang chiang hle ah kan ngai bawk a ni,” an ti.
KVK, Kolasib ram theh tum chungchanga thil fel tawk lo awm ni a lang chungchangah, Kolasib Journalist te hmalakna an thlawp tlat thu MPYCC chuan an sawi a. Mawi lo taka Mizoramin Journalist a neih chhuanawm tak tak te mipui hmaa, Cabinet Minister leh Kolasib bialtu MLA nibawk K. Lalrinliana’n a tawngkhum avang hian ngaihdam dil ngei turin an phut thu an sawi bawk.