Formula 1 driver mipui ngainat leh tan hlawh Daniel Ricciardo chu a intlansiak ve leh dawn a. Tun season tawp thleng Red Bull Racing hnuaia team te zawk Alpha Tauri car a khalh dawn.
Kum 34 mi Ricciardo hian season harsa tak a hman hnuah nikum season tawp khan McLaren in an chhuahtir a. Hemi hnuah hian Red Bull ah hian kirin reserve driver a ni.
Karleh kartawp a neih tur Hungarian Grand Prix-ah a intlansiak dawn a, Dutch driver Nyck de Vries a thlak dawn.
Chiang zawkin
Grand Prix a vawi riay hnehna chang tawh Ricciardo hian Red Bull team-ah reserve driver ni mekin car khalh tur nei lo mahse F1 khawvel a la chhuahsan lo.
Tunkar khan Silverstone-ah tyre test neihin Red Bull tan a inlan a, hetah hian a che chhe lo. Heng bakah hian Red Bull Racing in Nyck de Vries thlak an duhna leh hmalam hun thlir chunga driver siksawi an tum avangin a tan huntha a inherchhuak niin a lang.
“Red Bull tana ka intlansiak leh thei tur hi ka lawm hle.” tiin Ricciardo chuan a sawi a. Alpha Tauri team principal Franz Tost pawhin, “A thiamna hi tu tan pawh hai theih a ni lo. Kan inhretha tawh hlawm a, a tan lo kir leh hian thil harsa tur a awm lo.” a ti.
A phenah eng nge awm?
Red Bull Racing thutlukna in sawizui a hlawh. Ricciardo kir leh turin F1 fans thenkhat ti lawm mahse De Vries chu hun an pe rei lo lua niin an ngai.
F1 huangah driver thar ten hun an mamawh thin tih a chiang, tu tan pawh thil awlsam a ni lo. Hei vang hian season chanve chauh driver fing tia sawi thin De Vries an pe hi engemaw chhan a awm niin tam takin an ngai.
Red Bull Racing team pangngaiah an no.2 driver Sergio Perez hma hunin sawi a hlawh. Mexican driver hi car tha ber a khalh chungin tunhnaiah qualifying-ah Q3 a zawnin tum nga a inlan pha tawh lo.
Contract zo tur a nih bawk avangin Red Bull lamin an nawrna niin mi tam takin an ngai a, kumin bak insiamthatna hun a nei dawn lo tih tilangtu ah an ngai.