Pakistan tlangrama thil puak avanga bus chesualah mi 13 vel an thi a, an zinga pakua hi Chinese an ni a. China sorkar chuan chhui chiang turin an thenawm sorkar hi a phut nghal.
China chuan bomb puak ngei a nih thu a sawi laiin Pakistani thuneitute chuan a khawl lam fel lo vang niin an sawi a. Thil puak avang hian bus hi khamah a lum phah.
Bus-ah hian mi 30 chuang chuangin hmun kilkhawr tak, Kohistan ram biala hydropower plant awmna pan an ni.
Thi zingah hian sipai pahnih an tel a, hliam tuar eng emaw zat an awm bawk a. Chhanchhuah hna thawktute chuan thlawhna hmangin damdawi in an panpui.
Dasu hydropower project hi China-Pakistan Economic Corridor (CPEC) zinga mi niin a $ tluklehdingawn 65 zet sum senna tur niin ram pahnih inpawhna tur kawngpui, relkawng leh pipeline pawh siam tel tur a ni.
Pakistani chanchinbu, Dawn chuan bus hian Dasu plant bula hnathawkte awmna, Barseen-a plant-a thawk leh Chinese engineer-te a hruai niin a tar lang.
Chinese Foreign Ministry thupuangtu, Zhao Lijian chuan Pakistan chu a mawhphurtu hrem ngei tur leh an rama Chinese awmte himna ngai pawimawh turin a ti.
“China chuan Pakistan hi a theih anga thil thlen dan dik tak chhui turin a phut a; a titu man chhuaka a na thei anga hrem tur lehPakistan rama Chinese mi, zirna in leh project danga awmte himna pawh ngaihtuah turin a ti,” tiin a sawi.
Chanchinbute pawhin chetsualna hi beihna vang niin an chhuah hlawm a. Tual chhung thuneitute chuan thil puak ta hi kawngpuia lo kam nge bus-a mi tih erawh a chian loh thu an sawi.
“A nunrawnthlak hle a ni,” tiin chhiatna thlenna province-a police hotu, Moazzam Jah Ansari chuan a sawi a. Helicopter-in a hmun hi a pan nghal niin Reuters chuan a tar lang.
News agency hian thuneitu sang dang pathum vel pawhin bus hi beih ngei niin an sawi tih a tar lang.