Aizawl: Aizawl South III bial chhunga Mizoram University (MZU) hnuaia Under Graduate exam leh Post Graduate (PG) exam leh PG exam-a top 10 tlingte chawimawina hun bialtu MLA Prof Lalnunmawia’n a pisa-ah a buatsaih.
Prof F Lalnunmawia, MLA, chuan hna tha hmu turin intihsiakna a sang hle tih sawiin, “Kawng hrang hrangah exam-te in la hmachhawn ang. Graduate chu mite pawn puitling china an ngaih a ni a. Hlawhtlinna chang turin taimak leh zual zel a ngai thung a ni,” a ti.
Aizawl South III bialtu MLA chuan hlawhtlinna rah lo tur chuan a zar dang zawk lawn leh zel a ngai thin ang hian, tha thlah lo leh beidawng lova beih chhunzawm zel a tul thu a sawi a. Mahni thahnem ngaihnaah hlawhtlin leh tlin loh a innghat nasa a, zirlaite chu nu leh pate tana innghahna tlak ni zel tura a beisei thu a sawi.