Chief Minister Zoramthanga hovin India-in G 20 Presidency a chelh chhunga thalaite hmasawnna tura duan, Youth 20: Meet on Nationalism, Patriotism & Development khuhhawnna hun Vanapa Hall Aizawlah neih a ni.
Ministry of Youth Affairs & Sports chuan India ramin G-20 Presidency a chelh chhunga India ram hmun hrang hranga Youth-20 Programmes a hman mek chu Mizoramah hman a ni ve dawn a. G-20 Secretariat lamin phalna an pek tawh angin heng programme te hi thalaite leh zirlaite hnena Mizoram tan, ram leh hnam tana hmasawnna thil pawimawh tak tak inzirtirna hun atan sports department leh MZP tangkawpte hian buatsaihin hma an la a ni.
Chief minister chuan thu sawiin thupui pawimawh tak hmanga thalaite tan Y-20 meet buatsaih a ni chu lawmawm a ti a. Intawhkhawm thupui zinga pakhat nationalism – hnam thinlung chu pawimawh a tih thu sawiin, hnam thinlung chu hmanlai atang tawhin hnam dangin mahni hnam an chimral loh nan a lo piang a hnam humhimna atanga lo chhuak a nih thu a sawi. Hmasawnna atana hnam rilru put a pawimawh thu a sawi bawk.
Sports Minister Robert Romawia Royte pawhin thu sawiin India ramin G-20 Presidency a a chelh chhunga tangkai thei ang bera hman a tum dan leh chumi kal zelah chuan thalaite ngaih pawimawh an nih thu a sawi a. Y-20 meet duanchhuah a nih dan sawiin, Mizo thalaite mamawh leh an tana tangkai tura ngaih anga buatsaih a nih dan leh, fund source hranpa a awm loh avanga senso tur pawh phal taka state sorkarin a tum avangten lawmthu a sawi bawk a. Y-20 chuan Mizoram pum huamin thalai 21,000 huam tuma buatsaih a nih thua sawi.
Y-20 Meet khuhhawnna hi district tinah la chhunzawm tur a ni a, nimina hun hmanah hian Betty Lalthantluangi, Joint Director, MSACS chuan ‘Intravenous drug use & Harm Reduction Services’ tih thupui hmangin presentation a pe a. ‘Awareness on Social Media & Cyber Crime’ chungchangah Lalengzuala, Informatics Officer, ICT Department chuan inhrilhhriatna nei bawkin, Prof. J. Doungel hnen atangin theme subject ‘Role of Youth in Democracy and Governance’ thusawi ngaihthlak a ni bawk.