Aizawl: Central YMA hnuaia ruihhlo dotu, Central Anti Drugs Squad (CADS) 5-naa member turte chu nimin khan Central YMA committee room-ah lak luh an ni.
CADS member tur hian Aizawl khawpui chhung branch hrang hrang atangin member ruat thin an ni a, batch 5-naah hian member 24 leh a ho khawm tu nihna mi 6 an awm dawn a, convener tur chu R. Lalchhandama a ni.
CADS member thar lak luhna inkhawm hi Central YMA Vice President Lalhmachhuana’n a kaihruai a, president R Lalngheta’n fuihna thu a sawi.
He huna an tar lan danin CADS batch 4-nain an hun chhung, April 20 atanga July 14, 2023 chhung khan heroin hawng 667, tual chhung rate-a Rs 1,66,75,000 man hu an man.
CADS batch 4-nain an term an hman chhungin ruihhlo zuar leh ngawlvei mi 383 an man a, an mi man zinga 60 chu excise kutah an hlan a, mi paruk chu police kutah hlanin, forest department kuta hlan mi pakhat a awm a, ruihhlo ngai mi 248-te counselling an pe a ni.