Tunisian nula tan hlawh Ons Jabeur chuan a kum zawna Wimbledon final lut turin a mamawh result a vaw chhuak a. Set hloh hmasa zawk nimahse a khingpui lehthal in hnehna a chang.
Ningani zana semi-final inkhelah Jabeur hian Aryna Sabalenka chu 6-7 (5-7) 6-4 6-3 in a hneh a. Set hmasa zawk hlohin set hnihnaah 4-2 a hniam zawk a nihlaiin a insiamtha a, a tawp thleng inthlahdul leh tawh lovin a kal vung hle a, Marketa Vondrousova nen final an khel ang.
Final khel turte pahnih hi Grand Slam la champion ngai lo an ni a, zaninah hmeichhe tennis singles Grand Slam champion thar bakah Wimbledon champion thar an awm dawn tihna a ni.
A hun a thleng ta
Centre Court a inkhelah nikum final a Elena Rybakina laka tlawm Jabeur hian tantu a ngah a, mipui thawm a ring.
Nikumah a chetthat avangin mipui ngaihven a hlawh a. A inkhel hmuhnawm thin leh a feina leh tlo na vangin mipui tan a hlawh.
Quarter-final a a hneh champion lai Rybakina ang thovin semi-final a a khingpui Sabalenka hi ball vaw na leh thahrui ngah a ni a. Hei vang hian quarter-final ‘gameplan’ tho la hmangin Jabeur a khel huaisen a. Sabalenka service na tak chu huai taka hmachhawnin a hnaihchilh fo.
Nimahsela a tactic a fuh nghal mai lo. Tihsual vanga point chawi a neih leh thin avangin Australian Open champion Sabalenka hian set hmasa zawk a la.
A set hlohin Jabeur inkhel a nghawng a, set hnihna tir lamah tihsual a neih bakah double fault nei zuiin Belarus mi Sabalenka chan a tha hman.
Mahse a tlona tilang ta chaihin 4-2 a hniam zawk a nihlaiin Sabalenka service a break sak a, 4-4 a nih hnuah inrintawkna lian tak nei zuiin a tawp thlengin dan a har tawh.
“Mipui in he inkhelah hian chakna min pe a, tlawm thei dinhmun atangin min hruai chhuak.”
“Ka chungah rinna in nghah avangin lawmthu ka sawi. Ka rilru lam inbuatsaihna a ka coach nen pawh hemi chungchang hi kan ngai pawimawh a, nakinah a bu ka la ziak hial mahna.” tiin Jabeur hian hlim takin lawmthu a sawi.
Vondrousova pawh
A khingpui tur hi a champion chuan African leh Arab hmeichhe zinga Grand Slam singles title la hmasa ber a ni dawn. Ani erawh Open era a Wimbledon hmeichhe singles a seeded ni lo final khel hmasa ber a ni a. A champion chuan a hmasa ber a ni dawn chiang.
Marketa Vondrousova in tun tournament a che tha tak Elina Svitolina chu 6-3 6-3 in a hneh.
World number 42 ni lai Vondrusova hian semi-final an khelh hma in grass court chu a chakna nia a ngaih loh thin thu a sawi a. Hei mai hi ni lovin a ban hliam zai vangin nikum October thleng a chawlh a ngai a. A tan hmabak a hautak.
Mahse inrintawkna a tlachham lova, player khelhdan inang tak pahnih inhmachhawnah a ball vuak a dik chu a chakpui.
“Thla ruk chawlh hnuah hetiang hi ka thleng leh thei ang em tih ka hre lo thin. Chuvangin final ka khel tur leh tennis tha taka ka khel leh thei hi ka lawm hle.” tiin a sawi.