- Lallunghnema, Charity Lodge
Chhiartute chibai tha ber ka buk a che u. Chawlhkar tir Thawhtanni apianga consumer pual article ziah hi thil harsa tak ni lo mahse buaithlak chin a tam khawp mai. Thupui bik neih a ngai a. Consumer interest leh issue te chhiar tam a ngai a. Ka hriatnain a daih loh chang a tam. Thuziak mi ka nau Zirsangkima phei chuan, “Ziah tur tlakchham chang a tam viau lo maw, i ziak thei zel mai si, ” min tihsak hial!
Nia, a chang chuan han buai deuh phat chang ka nei thin. Mahse, tunlaia mobile phone changkang hmang hian thil thar kan lo hmu ve thei zel a. Ka thiamna pan hle mahse, ka ‘search’ a, ka hmu ve mai thei bawk. Consumer issue chi hrang hrang ka hai chhuak ve leh mai thin bawk a. Ka lawm thei thin khawp a ni.
Consumer right vei ve na fam chu, kan sawi a, kan titi a, kan ziak bawk a. Chhiartuten an lo hlawkpui hi kan duh ber a ni a. Kan lawmna tikimtu a ni bawk thin. Chhiartu lo pung zel se, tangkaipuitu lo awm zel se, tih chu kan ‘main goal’ a ni tlat! Tichuan ka ziak zel mai tur a ni.
Tunah hian consumer pual bik atana ka lehkhabu 7-na tur chu ka peih ti tih ve leh ta a. A bu hming atan ‘Consumer-te Zalenna’ ka ti. Remchang hmasa berah tihchhuah ka tum. A dam han hauh phawt ila, Pathianin rem a tih chuan ka tlangzarh ve leh mai thei turah ka inngai a ni.
Hemi chungchang hi ka sawi nial nual tawh. Ka duh ber chu Consumer-te engthawlna a ni bur!
Thil pakhat ka han zep leh lawk teh ang. Ka ninhlei a ta langin thu nawi te te, zirtirna nei tha ve zek ka pho chhuak thin a. Tlar hnih khat lek lekin thufing nia ka hriat,zirtirna tha tak awmna ka phuah khawm a, a bu atan KIMNA KAILAWN ka ti, phek 150 vel chauhva chhah a ni a. Bu khat man Rs. 150/- a ni. Thu tha hlawm khawm’ a ni ber e. Tunah hian ka la tlangzarh lo. Tlangzarh ka duh. Mahse, ka peihnain tlin tak maw le!
Consumer kan ni vek. Thil chi hrang hrang leitute hi dikna leh chanvo nei kan ni. Mi zawng zawngin thil kan lei vek. Chanvo kan nei vek. Chu kan dikna leh chanvo chu kan hmang tangkai tur a ni.
Bazar hmuna kal kher lo pawhin, khawi hmunah pawh thil lei ila, kan thil leite chu thlai a ni emaw, thei a emaw, chhang emaw pawh ni se, pawisa kan hmanna thilah tawh phawt chuan dikna leh zalennate chu kan nei a ni.
Chu kan dikna leh zalennate chu kan thatna tura pek kan ni a. A hlu em em a ni. Chu kan hlutna leh kan ropuina min siamsaktu chu Consumer Protection Act hi a ni.
Thil zuartu chuan leitu a mamawh a, leitu an awm loh chuan thil zuartu chu ‘engmah lo’ mai a ni. Thil zuartu chuan a thil zawrh chu a hralh chiah khan ‘hralhtu’ a lo ni a. A thil hralh chu a innghahna pawimawh tak a ni. Zuartu nihna chu a tawp ngawt thiang lova. Dawrtu leh leitute an awm khan ‘hralhtu’ a lo ni thei chauh a ni. Thil zuartu leh hralhtu chu lak hran theih a ni lova, thliar hran theih a ni hek lo.
Chutiangin zawrh ringawtin awmzia a nei lova, lei a ngai a, hman a ngai a ni. Chutichuan thil zawrh chu leitu hnena hralh a nih khan mihring khawsak phung a lo kim a. Nun khuain awmzia a nei thin a lo ni. Thil hralhtu leh thil leitute chu inzawm tlat an ni tur a ni a. Thil hralhtu chu leitu a mamawh a. Leitu awm lo chuan hralhtu chu a hlawhchham thin a ni.
Tuna kan hman mek Consumer Protection Act 2019 hi Rules siam a nih hnuin kum 2020 atang khan India ram pumpuiah hman a ni a. Consumer-te humhalhna tur a ni a. He Dan hian a huam zau hle a. Thlai, thei, buhfai,chi, chini, chhang, thawmhnaw leh bungrua chi hrang hrang leitute bakah service hmangtute chu a huam vek a ni kan tih tawh kha.
Sum leh pai senna ang chi reng rengah chuan thil hmangtute hian ‘right’ an nei vek a ni. Tha taka miin thil a lei a, tha taka mi dang service a lei chuan chu chu ‘Consumer-te Zalenna’ a ni a. Mahse, zalenna awmze nei a ni tur a ni. Zalen tih avanga Dikna hmansual awm thei tho tih erawh kan hriat ngei ngei a ngai a ni.
Tun tumah hian Damdawi In pakhat leh heta thawkte hrem thu ngaithla ho leh dawn a. Hetiang thu ka sawi hian chhan a nei a. Consumer te hian zau tak leh awmze nei takin chanvo leh dikna kan nei a. Dam lo, man chawia damdawi ina awmte hian dikna an nei a. Hlim leh lawm taka enkawlna dawn chu an chanpual a ni. Consumer Protection Act hian kan himna turin min veng tlat a ni. He Damdawi Ina enkawl vaipa pawh hian a dikna a hria a. Chu chu a champion pui a nih hi!
Saptawnga an report danin ka han sawi lawk ang nge:
‘Consumer Court fined Two Doctors and a private nursing home Rs.80 lakhs for foulty operations’.
Odisha Consumer Court chuan doctor pahnih leh private damdawi in chu an dam lo enkawlna a an service chhiat(inthlahdah) avangin cheng nuai 80/- a chawitir a. He damlo hian a hna a chan phah a ni.
Hei hi thil thlen dan chu hei hi a ni. Sambalpur District a Modipai khuaa cheng Sumit Dash -a chuan Sambalpur leh Burla inkara a zin laiin ‘accident’ a tawk a. He motor accident avang hian Sumit Dash a ke dinglam leh ban a tliah phah a. Hetianga accident a tawh ve leh hian Burla- a Private Hospital chu panpui nghal a ni a. Ruh lam thiam Doctor Surey Jain thurawnin accident tawk Sumit Dash- a chu private hospital dangah inenkawl turin sawn a ni a. He Private Hospital-ah hian surgery chu tihsak a ni a, cheng nuai khat chuang Dash-a hian a seng a ni. Surgery tih a nih hnu hian Sumit Dash-a hriselna chu a lo chhiat phahin harsatna a tawk nasa hle a.
He surgery tihnaah hian stainless steel an phum tel a ni. Hei vang hian a that chhuah theih loh pha a ni. Sumit Dash-a hriselna chu a lo tla hniam zel a, a tha chhuak hle thei ta lova. A hna hlu tak chu thawh chhunzawm thei lovin a chan phah hial a ni.
Accident tawk Sumit Dash-a chuan, (a tawi zawngin sawi mai ila —llh) Consumer Commission-ah complaint a thehlut ta a, Consumer Disputes Redressal Commission chuan dam lo enkawltute leh Private Nursing Home hi cheng nuai 80/- a chawitir ta a ni. Source — Law Trend.