AIZAWL: Mizoram Journalist’ Association, Kolasib District chuan Krishi Vigyan Kendra, Kolasib ram, in hmun atana theh tumna awm mekah chanchinbu mite chu dawt puangzar/thehdarh anga puh an nih chungchang sawifiahin thuchhuah an siam.
An thuchhuahah an tar lan danin KVK, Kolasib ramah in hmun theh tumna a awm nia an hriat avangin chanchinbumi thenkhatte chuan thil awmzia hriat tumin July 6, 2023 khan an tlawh a. KVK ramah hian in hmun thehna tur perh (peg) tam tak khen a ni tih an hmu a. A hmuna tlawhtute hian khawtlang hruaitu thenkhatte an bia a, thil awm dan an zawh chian hnuah he thil hi Vengthar MNF party hotute hmalakna a nih thu an dawng a ni.
KVK pawhin an hriat loha perh (peg) khen a nih avangin dan lova ram chhuh luih tumna (encroachment) niin an ngai a. Mi thenkhatin party pakhat press release behchhana puangzar anga an puhna chu dawt a ni tiin, “Eng party-in nge KVK ram chungchangah hian press release siam kan hre lo a. A hnuah Kolasib bialtu MLA Pu K Lalrinliana, Minister hian helai ram hi a tlawh tumin ama tihtir a nih thu a sawi a ni,” an ti.
MJA Kolasib district chuan in hmun nei loten in hmun an neihna tura hmalakna hi an dodal lo va, in hmun nei lo tak tak leh mamawh ngawih ngawih, khawtual mi nghet ngeiten in hmun hi nei ngei se an duhpui zawk a. Chumi kawngah chuan sorkarin dan a nei a, dan angin engkim kaltir hmasain hmalak ni thin se tih chu an duh dan a nih thu an tar lang.
Minister K Lalrinliana’n KVK ram a tlawh tur thu an lo hmuh anga July 12, 2023-a chanchinbumi thenkhat a hmuna kalte chu MJA anga kal an nih loh thu an tar lang a. Hemi tum hian an beisei loh leh an rin loh tak maiin minister hian Kolasib District MJA-te chu dawt puangzar/thehdarh a, eptu party ang hialah puh an nih thu tar langin, “MJA member-te chu kan awmna party nen lam a hriat vek thu, amah tawiawmtu official leh party worker-te hriat laiin a sawi chiam mai hian min barakhaih tak zet a ni,” tiin, hemi tuma video clip, a thena zar chauh lang tura duh lai lai ‘cut then’ chu a tukah thehdarh an nih thu an tar lang bawk.
Kolasib District MJA chuan chanchinthar thehdarh kawngah a pawng atakin thu dik lo leh dawt an chhuah an la hriat ngai loh thu te, inhnialna tichhuak thei chi angah phei chuan thu lakna (source) rintlak an neih loh chuan an puangzar ngai loh thu sawiin, “KVK, Kolasib ram theh tumna awmah pawh hian department hotute berin an hriat loh avangin dan lova ram neihsak tumna (encroachment) niin kan hria a, source rintlak tak neia puangzar mai chauh kan ni,” an ti.
MJA innghahna hi ‘Service to the people (Mipui rawngbawltu)’ a nih avangin ram leh khawtlang tana tha turah chuan huaisen takin ke an pen thin laia dawt puangzar anga inpuhna leh eptu party ang hiala inpuhna hi MLA/minister leh politician dang ka atanga an la hriat ngai loh avangin, tun tuma thil thleng pawh hi mak an thu thu leh pawi an tih thu an sawi a. Thu thar puanzarna kawngah lungawi lohna an nei a nih pawhin vantlang hmaa sawi hian awmzia a nei lo va, tun hnuah chuan thleng tawh lo se an duh thu an tar lang bawk.
Kolasib District MJA chuan KVK ram, in hmuh atana theh tumna awm mek chungchangah chanchinbumite chu dawt puangzar/thehdarh anga puh an ni chu an ngaih thu tak avangin, July 14, 2023 khan ‘Emergency Meeting’ neia hemi chungchang an ngaihtuah hnuah, chanchinbumiten an tih ngai loh angin thil awmzia dik tak hi sawifiah tula an hriat avanga sawi fiah an nih thu an tar lang a ni.