Aizawl: MPCC Spokesperson leh Gen. Secy ni bawk, Dr. Lallianchhunga leh Spinal Chord Injured & Persons Living With Wheelchair Society of Mizoram (SCI & PLWWSM) hruaitute chu Inrinni khan Zonuam-ah an inkawm.
An inkawmnaah SCI & PLWWSM hruaitute hian an harsatna hrang hrang an sawi a. Thingtlanga an member-ten damdawia inenkawlna tha an neih that tawk loh thu leh khawpuia an member-te pawhin damdawi a inenkawlna senso leh sorkar building sak danah harsatna an la tawh mek zel thu sawiin, Congress party Policy No. 1 ‘Tang Puihna’ an nghahhlelh thu Dr.Lallianchhunga hnenah hian an sawi.
Dr. Lallianchhunga pawhin thu sawiin, “Rualbanlote (PwD)-te hi The Rights of Persons with Disabilities Act, 2016-in an chanvo a humhalh tha em em a, an zahawmna humhim kawngah te, an thiamna an hman tangkai theihna tur remchang siam sak kawngah te, an pianphung avanga thlei bikna awm lova an thlen theih chin sang ber thleng thei tura tanpui te, an chetvelna awlsam tura hmun leh hma, sorkar building leh vantlang intawm inte siam rem kawngah sorkarin a tih tur a tih that a ngaih bakah, biak inahte pawh wheelchair hmangtute tana kalna siamte hi a pathian thu em em a ni,” a ti.
MPCC Gen Secy chuan Congress party-in Tang Puihna an neih thu leh Lalsawta kaihhruaina hnuaia din sorkar tha in a tih ngei ngei tur a nih thu sawiin, “Dinhmunin azir loh avanga tang thei lote pawh tanpui kan tum. Pu Lalsawta hoin mi rethei leh pachhiate tana pawha pa nih tling tak sorkar tha din Congress party chuan a tum a. In harsatna thinlung taka hrethiam mi Congress party-ah hruaitu tam tak an awm a ni,” a ti bawk.
SCI & PLWWSM hian Mizoram pumah member 200 chuang a nei mek a, an Founding Father chu tuna Maryland (United States)-a cheng mek, Dave Chhakchhuak a ni.