Major League Soccer team Inter Miami CF chuan Argentine forward Lionel Messi chu kum 2025 tawp thleng contract an ziahpui thu an puang a, an star player thar hi an lakluh fel thu an puangzar.
Kum 36 mi ni tawh vawi sarih Ballon d’Or dawng tawhtu Messi hian tun season zawh khan French champion Paris Saint-Germain a contract a hman zawh hnuah a chhuahsan.
World Cup a Argentina hlawhtlinpuitu Messi chuan, “United States-ah leh Inter Miami-ah ka football zinkawng a bung thar ka zawh tur hi ka phur tawh hle.”
“Kan rilru a kan dah hmasak ber chu team in tum a nei a, chu tumah chuan kan hlawhtlin theihna tura thawhho a ni. Helai hi ka in thar a ni a, hmalam an panna tura tha thawh ve ka chak tawh hle.” tiin Messi chuan a sawi.
PSG tana a khelh chhungin Messi hian match 75 khelin goal 32 a khung a. Season liamta khan Ligue 1-ah goal 16 khungin assist vawi 16 a nei bawk.
Inter Miami hi MLS season kallaiah Eastern Conference-ah a mawngphah an ni a. Match 22 atangin vawi nga chiah hnehna an la chang.
League season chawhnu lamah match 12 khelh hmabak an la nei a, Messi hovin an season siamthat an tum ang.
Messi hian July 21 a LIGA MX team Cruz Azul nen Leagues Cup a an inkhel turah a team thar tan hian a khel ve thei dawn.
Inter Miami neitu zing ami David Beckham chuan, “Vawiin hi ka suangtuahna a tak ram chan ni chu a ni. Leo ang player ropui in kan club a zawm hi a ropui ka ti hle. Inter Miami-ah mi tha tak kan lawm lut a ni.”
“Kum 10 kalta a Miami a bul kan tan dawn a, khawvela player ropuite he khuaah hian hruai luh ka duh thu ka lo sawi tawh.” a ti.