LPS Pro Fight vawi 10-na leh professional a nih hnua a tum hnih nan October-a tan turin ruahmanna siam fel a ni a, a hmun tur erawh a la chiang thei rih lo.
Organising Committee chuan kuminah Falkland venga sak mek LPS Arena-ah huaihawt a tum a. Mahse, tun dinhmunah thawh zawh hman a ni dawn em tih a chian theih loh avangin a hmun tur chiang takin a sawi theih rih lo a ni.
Nikum ang bawkin weight hrang pangaah title inchuh leh tur a ni dawn a. Kum 17 chin chung lam a duh apiang Mizoram leh state dang aṭang pawhin anmahni insengsovin an tel thei ang.
Kum kal taah Mizoram mai ni lovin zohnahthlak tute pawh tel phalsak a ni tawh a. Hetih rual hian Pro Fight boruak an lo hriat atangin India ram hmun dang hmar chhak state mai ni lovin Haryana, Delhi leh state lian zawka boxer-ten tel ve an chak thu an sawi. Tun tumah an tan kawng hawnsak a ni a, senso an intum vek a ngai thung dawn a ni.
Mizo boxer-te tam zawk an tel theih nan weight then dan thenkhat erawh tihdanglam a ni a; flyweight-in kg 48-52 huamin bantamweight-ah kg 52-56, featherweight awm tawh lovin lightweight-ah kg 56-61, welterweight-ah kg 61-67 leh middleweight-in kg 67-74 a huam dawn a ni.
Nikumah flyweight-ah Laldinsanga (Lunglei), bantamweight-ah Lalrinngheta (Tuipui), featherweight-ah Lalrosangzuala (Chaltlang), lightweight-ah Vanlalawmpuia (Khuangthing) leh welterweight-ah C Lalhruaitluanga (Chawngtlai) an champion.
Pro Fight hnuah Dinsanga’n professional boxing vawi thum khel zuiin a chak vek a, tum khat ve ve an inlanah Rinngheta leh Hruaia an chak bawk. Awpa erawh Thailand-ah tum hnih Asia title chuha a fehchhuahah tlawm zawn ve thungin, Rosanga a inhnek zui miah lo.
Organising Committee chuan a hmun tur tihchian mai theih ni rih lo mah se boxer-ten inbuatsaihna hun an neih theih nan Pro Fight neih a nih hun tur puanzar tha a ti a. A tir atanga hman theih a nih loh pawhin LPS Arena-ah zan hnih awh turin title fight buatsaih theih erawh a beisei viau a, title chuha inhnek mai bakah Pro Fight champion lo ni tawh NT Lalbiakkima leh mi dangte tan hmun siamsak tel ni se a duh bawk.
2009 khan LPS Vision leh Mizoram Boxing Association-in a vawi khat nan hlawhtling takin Pro Fight an huaihawt a, 2010 leh 2011-ah chhunzawmin 2014, 2015, 2016 leh 2017-ah kum li neih zawn leh a ni.
2018 khan Mizoram inthlanpui avangin a hmun turah harsatna a awm a, neih theih a ni ta lo. 2019 kum tir lamah chhunzawmin hmar chhak state dang atangin boxer sawm an ni a, boruak lian tak hnuaiah a hlawhtling hle.
Covid-19 leng avangin 2020 leh 2021-ah buatsaih zui theih a ni lo a. 2022-ah tharthawh leh a nih laiin Mizoram Boxing Association an tel remchang lo ve thung a, a hma zawnga Promotional Fight ni thin kha Professional Fight pangngai angin LPS Promotion-in a kalpui a, a vawi hnih nan kuminah huam zau zawka chhunzawm leh a tum a ni.