Wimbledon champion Marketa Vondrusova

Marketa Vondrousova chu seeded player nipha lo zinga Wimbledon women’s singles title la thei hmasa ber a ni a. Chak tura rin hlawh zawk Ons Jabeur chu hnehin final-ah hnehna a chang.

Kum 24 mi Vondrusova hi world rankings-ah number 42 ni lai a ni a. Kum 2022 a final khel Jabeur lakah hian a tawp thlengin chiai lovin a chesual tlem zawkah a tang. Jabeur hian Grand Slam final-ah a vawi thum nan a tawp a thleng zo lova, 6-4 6-4 in Vondrusova a chak.

Kum 28 mi seeded number six nihna changtu Jabeur hian Grand Slam final tum thum a khelh tawhah a tlawm zawkah a la tang vek a. Hetihlai hian a chak zawk Vondrusova hian a banrek hliam avangin nikum khan Wimbledon-ah a entu ah bak a tang thei lova. Thla ruk chuang a inkhelh theih loh hnuah a kir leh dan a ropui hle.

Zinkawng ngaihnawm

Centre Court-ah a chak velah a hlawhtlinna avangin chhuatah a tlu nghal a. Lawm avanga mittui nen Vondrusova chuan amah tantu mipui a chhawn.

Kum 24 chauh nise a tennis zinkawng a awlsam lova, hlawhtlinna karah harsatna a su tlang hnem.

Kum 2019 khan tleirawl kum 19 mi mek niin French Open final a khel a, Ashleigh Barty lakah a tlawm.

Clay court khel thiam nia hriat Czech mi Vondrusova hi a ban hliam in hun engemaw chen a tihbuai avangin beisei ang result a nei lo leh thin.

Tun tum tournament-ah chak tluangin a ralthuam hlauhawm nia ngaih – top-spin forehand leh a khingpuite mila a insiamrem theih fo thin chu grass court-ah a chetthatpui.

Amah ngeiin semi-final a luhin grass court tournament-ah hetiang taka chetthat a inbeisei loh thu a sawi hial a. Kumin Wimbledon a khelh hma hian grass court-ah vawi li bak hnehna a la chang ngai lo.

“Ka ban zai nawn a nih khan min nghawng thui a, tennis pawh ka en hleithei lo. Thla ruk ka inkhel lova, thla thum chhung ka ban cher ngheh tlat a ngai. Chuvangin ka inkhel tam lo.” tiin a zinkawng a sawi.

“Ka huntawn hi sawifiah mai pawh ka la harsat, ka hlim hle a ni.” a ti.

Hetihlai hian a khingpui Jabeur hian African leh Arab mi hmeichhe singles Grand Slam title la hmasa ber nih a tum a, mahse hun pawimawhah inrintawkna a tlachham a, a tihsual leh thin a tuar.

“Ka result hi a na a, ka tennis khelh chhunga ka tlawm zinga la hreawm ber a ni ang.”

“Vawiin hi ni duhawm lo ka tan chuan a ni a, mahse ka beidawng dawn lova, a ai tha in ka lo kir dawn.” a ti ve bawk.

Leave a Reply

error: Content is protected !!