- Dr. C. Lalrampana
A KAMKEUNA
Mamawh inpekna atana ruahmanna tha (Supply chain management (SCM) hi sumdawng emaw, lo neitu emaw, thil engpawh siamchhuaktuin, a thil siam atana hmanrua a fawm khawm atanga a siam chhuah leh thawhchhuah, dehchhuah a lo thlawna a riral mai mai loh nan leh awmze nei taka mimal, chhungkua, khawtlãng, ram, sorkar, rampawn, mipui thleng phak mamawh phuhruk tura awmze nei taka a hlut dan chhut chhuaka damchhung daih tur eizawnna bulfuk leh chhenfãawm taka chhawr tangkãi a nih theih nana khãwl thluak nei (computer system) hmanga ruahmanna fel taka a duan chhuah hi a ni.
RUAHMANNA THA CHU?
Mimal thilsiamtu, loneitu, pawl, society; proprietor, manufacturing company industry neituin emaw a thil siam chhuah, dehchhuah, thar chhuahte awmze neia a tihral (dispose) theihna turin supply change management (SCM) a mamawhin a kalpui tur a ni. SCM chuan ruahmanna (planning); tihdan phung (processing); hmanrua (material); ,bawhzuina (execution); a taka hlenna (implementing); hmathlir (vision); sumhnar (sources); bultanna sum (capital); remhriatna (strategy): innghahna mumal (principle); mamawh (demand); siam chhuah (product); hlawhfa man (labour charge}; tha leh zung (activities); hnathawktu hlawh (salary); mithiam (technician); phurh velna (transportation); hlawk leh hloh (profit & loss); a man bitliah (rate); dahthatna (cold storage or godown); kawlphetha (power supply); tui water supply); kalkawng (road communication); inbiak pawhna (tele communication); a chhia leh hralh hleih theih loh thlen hun thlengin a fãwmkem vek thin a ni. Heng zawng zawng hi ngaihtuah tel vek a nih loh chuan hlawhtlinna fumfe a awm thei lova; mipui tana innghahna tlak leh rintlak a tling thei hek lo. Mizorama sumdawnna leh kutthnathawk, dawrkai leh industry lam kalpuitu tam takte hian hetiang zawng zawng hi ngaihtuah fel hmasa lovin hma an la thin a, a tawpah beidawnna ruamah tla lutin an thil tih tur tam tak an pamtul leh thin. Entir nan- Mithiam tak tak sap sikul dintute pawhin sikul hawn phalna sutleh (cancell) ngaia an pamtulleh fo thinna chhan pawh hi an sikul dinna hmun leh a chhehvela sikul naupang awm thei tur zatte hisap felfai hmasa thin lovin sikul an din veleh ringawt thin a; an rin ang leh beisei ang a nih loh leh thin avangin tawpsan a lo ngai leh thin a ni. Hetiang bawk hian lo nei mi, kuthnathawk mi, dawrkai, industry & enterprise kalpuitu etc. tam takin ruahman lawkna (pre-plan), a hlawk dan tur (marketing survey); bungraw inpek chhãwnna tura ruahmanna tha (supply change management) duang lãwk hmasa lovin huai takin an dai (risk) mai thin a; chuvangin, mi tam takin beidawnna nen an thiltih tum chu an pamtulleh mai thin a ni. Chuvangin, engpawh ti dawn ila, taimãkna, rinawmna, huaisenna leh teirei peihna nen ruahhman lãwkna tha tak nen a taka thawh a ngai a ni tih kan hriat a pawimawh hle.
A THA CHAUH NI SE
India ram chhunga thilsiam, state dang atanga lãkluh pawh, kan state chhunga keimahni siam chhuah leh thar chhuah pawh ni se, ramdang atanga lakluh leh ramdang thil siamte aiin a nihna (quality) a tha lo tlangpui niin a lang a. Abikin kan state chhunga siamte hian belhchian a dawl lo bik hle thin nite hian a hriat theih. Ei leh in lam chi leh thlai leh anhnah ilo lam chi ngat phei chu a hlang (organic) tawh lovin a dava sãwt hle a tih theih awm e. Food & Drug Administration, H&FW Department hian tihtakzetin kan thil chin leh zawrh, thar chhuahte hi mihring ei atana thianghlim leh tlãk a ni em tih hi tihtakzetin finfiah thin se, mihring hriselna atana tha leh thianghlim, hrisel tha leh zawrh tlãk chauh hralh tura chhawp chhuah thin ni se, tun ai hian mipui hi kan hrisel zawk ngei ang. Chutiang chu sawi loh, Legal metrology lamin sumdawngho buk dik lo pawh an han endiksak ve thin naa a taka bawhzui kawngah hma lakna tak tak a awm thin lo nge a bikin gas cylinder, petrol zuar, sazuar leh rawsawt buhfai zuartute zingah sawisel kai an la tam hle. Thei rah, thlai leh anhnah ilo phei chu a tak (organic) hlang hi a vang tawh hle a; thei rah ilo um hmin chi phei chu calcium carbide hmangin an um hmin chawp a; anhnah leh thlaite pawh DDT (dichloro-diphenyl-trichloroethane) leh lei tihthatna chemical tel chihrang hrang hmangtein an chãwm lian thin nia sawi a ni. Hetiang hi a ni tak tak a, Food & Drug Administration, H&FW Department hian a endik ngai lo a nih chuan Cancer, santen,kawthalo, ngãwt, khawsikpui, ruhseh, thana, depression, anxiety, Alzheimer leh natna dang dang tam tak Zoramin kan ngah êm em nachhan hi ni ngeiin a lang. Chuvangin, sorkar leh Zoram mipuite hian heng thil dik lo tak takte hi tihtakzetin hnual suat ngam ila a van tihzia dawn em!
KOSHER CHAUH AW?
Ramthianghlim Israel tlawh tawhte chuan bazar leh thil zawrhna hmuna an kal chuan an thil zawrh reng reng ‘kosher’ a ni em tih uluk takin an belchiang tlãngpui thin. ‘kosher’ chu dan ang thlapa teh tlin leh tha danin a phal (quality, make fit, legalize & legitimize) tihna a ni. A bik takin Israel mi dik tak phei chuan ‘kosher’ loh reng reng chu an lei duh lovin sakhaw mi phei chuan an lei thiang lo a ni ber mai. Ram pawn atanga ei tur leh bungrua ilo an lãkluh dawn reng rengin finfiaha lo kosher-tu inspector an nei vek thin. Kosher loh chu a ruka bungraw tawlh erawh a awm ve thei tho. Mahse, sorkar leh a ram mipui nãwlpui khuan Kosher loh chu an hnualsuat ngam a ni. Kan zoramah erawh bûkna dik lo, thianghlim lo, hriselna tichhe thei, dãn phal loh, duh dan dana a man chhiar, kosher loh zawrh a tamin sorkar leh mipui pawhin engmah pawisakna nei lovin kan lei hmiah hmiah a, sumdãwng, thilsiamtu company leh industry etc zawng zawng pawhin an duhdan danin engkim mai hi an kalpui a, ram hrisel lo, takna leh dikna awm lo, rinawmna tlachham ramah kan inchhuah mek a ni.
A TLÃNGKAWMNA
Kan Zoram hian kan kristianna hi kãwrah hmangin a langa felna, mawina leh thatna, lãrna hi kan ngaisang em em a, takna leh dikna, rinawmna leh taimãkna leh hmangaihna tak tak erawh kan tlachham si. Kan thil zawrh leh sumdawnna bungrua ilo engmah rate bithliah fel fekfawk, a man inang tlang mumal awm thei ta reng reng lo, a tha leh tha lo hriat hleih theih tawh hek suh, inhmun lo ram leh ranvulh ilo, bungraw man duh tawk tawka chhiarna ram, mirethei leh hausa inkar zãu tual tualna state hlim ber anga record nei, a taka hlimna awm der si lo hian covid-19 hluar laia ‘Supply Change Management’ kalpui a nih lai ang khan Sorkar hian khauh takin a theih chin chinah kalpui leh se, a bik takin nitin mamawh ei leh bãr thil ilote hian rate mumal neiin dan leh dun mumal tak hnuaiah engkim kan inleitawnin kan inpetawn thei ang a, ramthianghlim ang khuan bungrua leh ei leh in tur ilo thil zawrh leh sumdawnna reng reng Kosher chauh kan inpetawn ve thei chauh ang. Chuvangin, hetianga hma latheitu tur Sorkar thar kan nei dawn em tih uluk takin Zoram mipuite hian i lo thlir teh ang u hmiang.