Tun dinhmuna solo artist lar ber zinga tel pha Harry Styles chuan kawng dik taka kalpui a nih chuan One Direction reunion neih a hnial ngai lovang, a ti.
Kum 5 chhung British boy band lar ni tura Zayn Malik, Louis Tomlinson, Liam payne leh Niall Horan te nena One Direction band an kalpui khan hlawhtlinnna namen lo an tawngbua a, 2015 khan Malik-a’n group a chhuahsan tak vangin tiam chin awm lovin an chawl ve ta a ni.
“Kan zavaia kan duhtlan a, tha kan tih bawk chuan zaiho leh a chakawm khawp mai. Kan awmho lai khan hmangaihna leh induhsakna a awm a, kawng dik taka kalpui a nih dawn chuan One Direction reunion neih hi ka hnial reng reng lo,” a ti.
Kum 2019 pawh khan Rolling Stone chanchinbu hmaah, tih tak tak duhna a awm chuan reunoin neih hi a harsat a rin loh thu a lo sawi tawh bawk.
Amah ang bawkin Tomlinson leh Payne te pawhin reunion an duh thu an lo sawi ve bawk a, a thleng turah an ngai.
Hetih lai hian Malik chungchang erawh sawi rik a awm lova, an lar vanglaia band chhuahsantu hming hi Sytles-a’n a lam ri lo bawk.