MPCC Manifesto Drafting Committee Vice Chairman Ronald Sapa Tlau chuan an party manifesto pakhatna, ‘Tang Puihna’ chu kuthnathawktute an ngaih pawimawh avangin an puala dah a nih thu a sawi.
Thawhtannia Tuivawl North Block Congress Extended Committee leh Political Training buatsaih hmanpuitu MPCC Adviser ni bawk Ronald Sapa Tlau chuan, Mizoram mipui za zela chhuta 75 vel hi kut hnathawktu chu Congress party chuan an ngaih pawimawh hle tih a sawi a. MPCC Manifesto Drafting Committee an thutkhawm hmasak berah kuthnathawktu pual, kuthnathawktute hamthatna tur an ngaihtuah nghal tih a sawi.
Ronald Sapa Tlau chuan an manifesto pakhatna, ‘Tang Puihna’ chu kuthnathawktute an dah tih sawiin, “He tang puihna hian mi mal tin emaw, a huho ang zawnga puihna a kawk a, mi mal emaw, pawl emaw, an din chhuah theihnan an mamawhna ang zawn zelah sorkarin a pui dawn a ni,” a ti.
Congress party in Sinlung Hills Council (SHC) Area chhunga awm te chu a theihnghilh loh thu sawiin Ronald Sapa Tlau chuan, “SHC hi tuna a dinhmun in hrechiang vek, a chhunga mipui beisei leh suangtuahna a phak lo viau ang tih kan ring,” tia sawiin, Pathian zarah sorkarna an chang a nih chuan, Congress party chu SHC hringtu an nih angin tun dinhmun aia chhawrnahawm zawk, a chhunga mipui chengte tana tangkai zawk leh thil tithei zawkin an siam dawn niin a sawi.
Inkhawm hi Lalbiakchhunga, Block Vice President-in a kaihruai a ni.