Aizawl: Manipur-a Zohnahthlak leh Meitei-te inkahnaa hliam tuar, Nehtinsat Haokip, kum 21 mi, New Zalenphai chuan nimin khan Central YMA ruahmannain NEIGRIHMS, Shillong thlenpui niin Shillong Group YMA-in a tul apiang an lo buaipui chhunzawm dawn.
CYMA hruaitute hnen atanga thudawnin, July 7, 2023-a Kangvai khuaa inkahnaah Nehtinsat Haokip hi kah hliam a ni a, Lamka Hospital lamah enkawl niin a taksa hmun thumah silai mu a tang tih hriat chhuah a ni a, refer theih a nih ve leh Indigenous Tribals Leader Forum (ITLF) hruaituten Central YMA hnenah tanpui dilna lehkha thawnin kar hmasa Ningani khan Aizawl rawn phurh thlen a ni.
Central YMA hruaituten lo buaipui chhunzawmin, Civil Hospital Aizawl-ah enkawl zui a ni a, Doctor ten hmunpui lam panpui vat tura thu rawn an pek angin NEIGRIHMS lam hi pan pui a ni ta a ni.
Central YMA chuan vanduaina tawk, Nehtinsat Haokip leh a patea, Nehlen Haokip te chu thlawhna ticket laksakin cheng sing 3 an pai a. Nehtinsat Haokip leh amah kalpuitute chu Shillong Group YMA ten Umroi Airport-ah YMA Ambulance nena lo hmuakin Hospital an panpui a, an buaipui chhunzawm zel dawn a ni.