Aizawl: Mizoram Pradesh Youth Congress Committee (MPYCC) chuan vawiina Prime Minister Narendra Modi-a’n National Democratic Alliance (NDA) meeting, Delhi-a a kohah Chief Minister Zoramthanga chu tel ngei tur leh Manipur-a Zofate leh Kristiante thlavang hauhna atan remchangah hmang turin an phut.
Nimina an thuchhuahah Congress Thalai chuan MNF party chu NDA meeting-ah hian tel ngei tura an phut thu tar langin, “Manipur a kan unau Zofaten harsatna rapthlak tak an tawh lai leh awmze nei taka Kristiante biak in 250 chuang suasam a, hal chhiat a nih tawh hnuah pawh BJP kaihhruai central-a NDA sorkar atanga an thlavang hauhna engmah a la awm lo te hi MNF President Pu Zoramthanga hian na taka a dem kan phut,” an ti.
MPYCC chuan Chief Minister Zoramthanga chu prime minister hnenah hian Manipur-a remna leh muanna a awm theih nan, a rang thei ang ber a hma la tur leh huaisan tak a nawr tur leh, sakhaw zalenna chungchangah pawh Manipur-a Zofate tawrhnaah hian a phen-ah RSS te hmalakna a awm ngei a hriat a nih avangin, hemi chungchang pawh huai taka sawi turin an phut thu an tar lang bawk.