Aizawl: Mizoram Chief Electoral Officer Madhup Vyas chuan nimin Champhai tlawhin kumin kum tawpa MLA inthlanpui neih tur inpuahchahna kalpui meka hmalaknate a endik.
Mizoram CEO Vyas chuan DRDO Conference Hall-ah District Election Official-te kawmin, Mizoramah inthlanna muanawm tak leh felfai tak neih a ni tawh thin thute, hemi chhawmnung zel tur hian thahnemngai taka tan rual a pawimawh thu a sawi.
CEO chuan kum 2018 inthlanpuiah khan state puma vote tla chawhrual aiin Champhai District-a vote tla zat percentage a tlem thute, kuminah erawh vote tla percentage a san theih nan SVEEP Plan mumal tak nei a, mipuite hnena vote thlak theuh tura sawmna siam mai bakah vote thlak tura mamawh leh tul dangte tam zawk chhawpchhuah a pawimawh thu a sawi.
Champhai District Election Officer (DEO) James Lalrinchhana chuan January ni 13, 2023-a Final Electoral Roll tlangzarhah Champhai district chhunga MLA bial pathum – Champhai North, Champhai South leh East Tuipuiah voter 56,362 an awm thute, Polling station 84 a awm mek a, thar siam belh a awm loh thu a sawi a, tun dinhmunah kumin inthlanpui atana hman tur EVM indaih zan Champhai district-in a kawl mek thu a sawi bawk.
Inkawmna hun hman zawh hian CEO chuan DC Office tlawhin EVM khawl dahna Strong Room, Vote chhiarna tur Counting Centre leh inthlanna kaihhnawiha mamawh tur hrang hranga ruahmanna kalpuite a enfiah.
Chawhnuah polling station-a hman thin hmun hrang hrangte tlawhin, inthlan nana hman tur a nih angin danin a phut tui, power supply, ramp, inthiarna leh tul dang Assured Minimum Facilities (AMF) te a awm tha em tih a endik nghal a ni.