Aizawl: Aizawl Ramhlun Sports Complex huam chhunga Chite Rehabilitation Centre te, kum 2013-a Laipuitlang leimin, kum 2014-a Ramhlun Sports Complex lei tawlh leh tun hnaia Hunthar lei tla hniama in leh lo chânte hnena sorkarin in sakna tur inhmun a lo pek tawh tihfel dan chungchang ngaihtuahin Revenue Minister Lalruatkima hoin nimin khan an thukhawm.
A pisaa thutkhawmah hian revenue minister chuan chhiatna thleng a mahni in leh lo chân vek, chenna in nei lote tan sorkarin ram leiin chenna in sakna tur ram pekah LSC emaw, house pass emaw tihfel a la nih loh avangin helai hmun neituten loan-te pawh an la thei lo va; chu mai bakah sorkar pawhin chhiah a chan zel a, chuvangin an LSC tur hi tihfel vat a tul thu a sawi.
Chite Rehabilitation Centre, Ramhlun Sports Complex hi sorkarin mi mal hnen atanga a lei niin helai hmunah in 100 awmna tura ruahman a nih bakah thlanmual, sub-centre leh vantlang hmun remchang te ram zuah a ni a. Helai hmunah hian chengna in nei lo mi 80 chuang hnenah insakna tur hmun pek an ni tawh a. Mi mal eng emaw zatin in leh lote pawh din tawh mah se, a ram neitu nihna LSC emaw, house pass emaw hi tihfel a la ni lo a ni.
Thutkhawmah hian Aizawl Bawrhsap Dr. Lalhriatzuali Ralte, Land Revenue & Settlement leh Disaster Mitigation & Rehabilitation Department aiawhte pawh an tel a ni.