Pakistan-a Afghanistan palai fanu chu tute nge an nih hriat lohten rei vak lo chhung an ru bo va, hliam pawh a tuar nual niin thuneituten an sawi.
Silsila Alikhil-i hi Zirtawpni khan Pakistani khawpui, Islamabad-a a chhuak haw lam chu darkar eng emaw zet chhung ruk bo a ni.
Afghan foreign ministry chuan kut a tuar nual a, thubuai pawh an thehlut tih a puang.
Inthenawm ram pahnih hi tun hnaiah an inkar a tha lo hle.
Pakistani thuneitute chuan kum 20 bawr vel, Silsila Alikhil-i hi tuten emaw an in pana a kal chu car-ah pawt lutin an tlanpui a, kut an thlak niin an sawi ve bawk.
Chhuah a nih hnuah damdawi inah enkawl zui a ni a. Ambassador, Najib Alikhil chuan hetianga mihring rawng taka tih hi a dem thu a sawi a, a fanu chu a dinhmun a tha tih a sawi bawk.
Afghan foreign ministry chuan he thil thleng hi tha lo an tih thu leh Pakistan chu an ram palaite leh an chhungte himna tura hma la nasa turin an ti.
Pakistani foreign ministry pawhin ambassador venhimna hi an tihkhauh thu an puang nghal a. Interior Minister Sheikh Rashid Ahmed chuan Prime Minister Imran Khan pawhin he thiltitute hi a rang thei ang bera man chhuah a duh tih a sawi.