West Ham United chuan tun season a coach thar hnuaia bul tan tur Tottenham Hotspur chu pre-season inbuatsaihna inkhelah an hmachhawn a, 3-2 in an hneh.
Australia-ah team pahnihten inbuatsaihna neiin hun an hmang mek a, Perth a Optus Stadium-ah mipui 46,266 hma a inkhelah Hammers in huntawp dawnah chakna goal an khung.
Spurs hi coach Ange Postecoglou hnuaia khel an ni a. An coach thar hnuaiah attacking football hmuhnawm khelh an tum tih hmuh theih mahse an tlarhnung a phui lo.
Hammers in captain Declan Rice an chan chungin an inbuatsaihna a buai rih lova. A zawnin pre-season inkhel vawi thum an chakna niin Danny Ings leh Divin Mubama ten first half a goal an khung hnuah Gianluca Scamacca chuan chakna goal a khung a. Spurs tan second half-ah Giovanni Lo Celso leh Destiny Udogie ten goal an khung ve bawk.
Spurs in mi thar Guglielmo Vicario, James Maddison leh Manor Solomon te an khelh tir vek a. Pathianni hian Thailand-ah Leicester City an hmachhawn leh ang.
Hetihlai hian West Ham hi England-ah an kir leh tawh dawn a, Inrinni-ah Dagenham and Redbridge an hmachhawn leh dawn.