Red Bull Racing team principal Christian Horner chuan an reserve driver Daniel Ricciardo chuan a hmalam hun a Red Bull Racing tana intlansiak leh ngei beisei chungin Alpha Tauri car a khalh dawn tih a sawi.
Kum 34 mi Ricciardo hi tun season atan Red Bull reserve driver a ni chungin kar hmasa khan Red Bull hian an junior team Alpha Tauri car khalhtu Nyck de Vries an thlak a. Ricciardo hi tun kartawp atangin season tawp thleng a intlansiak leh dawn.
Red Bull team pangngaiah hian world champion ni lai Max Verstappen chuan kum 2028 thleng contract a nei a, ani chu a hmalam hun a nghet. Mahse an driver dang zawk Sergio Perez erawh kum 2024 thleng contract nei a ni a, tunhnaiah a chetthat tawk loh leh thin avangin a hmalam hunin sawi zui a hlawh.
“Daniel hian kum 2025 a Red Bull car khalh thei zingah invawrh ngei a tum. Hei hi a rilru a lian ber, a tum ber chu a ni a. Alpha Tauri zawm hi hemi kawngah hian a tana remchang ber tur niin a ngai.” tiin Horner chuan a sawi.
Sawi belh zelin, “Tun dinhmunah chuan season tawp thleng bak hi engmah la tihfel kan nei lova, a bak kan thlir lo. Kumtawp thleng Alpha Tauri in an hawh dawn.”
“Nakkumah kan driver turte hi Max leh Sergio te an la ni a, mahse engtiklai pawhin reserve team a talent tha neih hi a pawimawh.” a ti bawk.