English football club Leeds United chuan neitu thar an nei a. 49ers Enterprises in Pound maktaduai 170 a lei an dilna chu English Football League in a pawmsak hnuah tihfel a ni.
American football team San Francisco 49ers neitu 49ers Enterprises te hian kum 2018 khan Leeds United-ah hian neitu nihna 15% share an lei tawh a. Kum 2021 khan hei hi 44% ah kaichho turin an lei belh a. Tunah Andrea Radrizzani share neih zawng zawng leiin neitu nghet an ni.
Chairman thar Paraag Marathe chuan, “He club in hmalam a panna turin neitu inthlak hi bul tanna pawimawh a ni.”
“Tun hi Leeds United tan hun pawimawh tak a ni a, kan zavaiin rim takin hna thawh kan tan tawh. Tunah hian Leeds United hian season thar a kaisan nghal tum a bei turin inbuatsaihna kan kalpui mek.” tiin a sawi.
Leeds United hian an chief executive Angus Kinnear chuan a nihna ngai a chhunzawm ang. “49ers Enterprises hian kalphung thar, inenkawlna thar leh club intuaitharna tur an kalpui dawn a, Premier League club nghet kan nih theihna turin kaisanna leh inbenbel kawngah nasa takin min pui ngei dawn tih hi ka rinna a ni.” tiin a sawi.
Leeds tan a lawmawm
Kum 2017 khan Leeds United hi Radrizzani chuan Pound maktaduai 47 in a lei a, hemi hnu hian a neitu nihna hralh then thinin 49ers Enterprises hian a hnen atang neitu pumhlum ni turin 56% a la chan chu an leisak.
Radrizzani hnuaiah hian club in hma a sawn avangin fans te lawm a hlawh hman viau a, manager Marcelo Bielsa ruai in Premier League-ah an kaisang.
Nimahsela season liamta a an chetchhiat bakah Bielsa a ban bawk avangin fans ten an duh lova. A company in Italian club Sampdoria an lei bawk avangin Leeds United hi a hralh ta zawk a ni.
Radrizzani aiin E9ers Enterprises te hian club a chhun luh tur sum an nei zawk tura ngaih a ni a. Italian sumdawng hnuaia Leeds United in harsatna an tawh lian zingah sum mamawhna sang chu a tel.
Team inthuamthat nan sum sen a ngaih mai dawn bakah Leeds United stadium Elland Road leh an hmunhma te chu cheithat ngai viau tawh a ni a. Hengte hi an neitu tharte hnuaiah hian tuai thar theih a nih fans ten an beisei ang.