Spain defender Jordi Alba chuan Barcelona tana a khelhpui thin Lionel Messi leh Sergio Busquets te hnung a zui dawn a. Major League Soccer team Inter Miami CF a zawm dawn tih club president Jorge Mas chuan a sawi.
Mas hian kum 34 mi full-back hian an hnena inkhel turin contract a ziak fel tawh tih a sawi a. Karleh Thawhlehni a Atlanta nen an inkhelh hunah a tel theih tur thu a sawi tel.
Alba hian tun nipui khan Barcelona a contract a hman zawh hnuah club a chhuahsan a. An hnenah kum 10 chuang a cham chhungin match 459 a khel a, goal 27 a khung.
Blaugrana tana a khelh chhung hian La Liga title vawi ruk la in UEFA Champions League chu kum 2015 khan an chawi bawk.
Inter Miami hian Argentina tana World Cup an chawina kawnga mi pawimawh Lionel Messi an lakluh tawh bakah Alba in ram tana a khelhpui kum 35 mi Busquets te lalut fel tawhin pholanna hun an nei tawh.
Kum 2025 thleng contract ziak ve ve in Thawhtanni khan DRV PNK Stadium-ah mipui 20,000 hmaah phochhuah an ni.
Tunkar atangin vawi sarih Ballon d’Or dawng tawh Messi hian a team thar bulah hian training a nei tan a, Inrinni a Leagues Cup a Cruz Azul nen an inkhelh hunah inlan hman tur angaih a ni.
Inter Miami in European football a hming langsarte lakluh tumin hma an la nasa viau a. Messi, Busquets leh Alba ten an inkhelhpui thin kum 36 mi Uruguay striker Luis Suarez nen tunhnaiah sawizawm an ni a. Brazil club Gremio tan a inkhel mek.