Philadelphia 76ers general manager Daryl Morey chuan an player langsar zing ami James Harden chuan team danga khelh duh mahse Sixers team in hma an sawnpui a, title chuh thei team a siam thei tur player an neihna tur a nih chauh loh chuan trade a chhuahtir an tum lo tih a sawi.
Harden hian 2023-24 season lo awm tur atan a contract a Dollar maktaduai 35.6 manhu kum khat la awm chu hman a thlang a. Nakkum season zawhah free agent nih a tum.
A contract a kum khat la awm hman a thlan avang hian 76ers chuan an ‘trade’ a beisei a, Los Angeles Clippers tana khelh a duh niin an sawi mek.
Houston Rockets a Harden nena season riat lo hmang tawh Morey chuan a player in duhdan a neih chu tihhlawhtlinsak theih ngei a duh thu a sawi a, nimahsela an beisei ang an hmuh let dawn chauh a nih chuan chet an tum lo.
“Player tha tak kan dawng let dawn emaw, player tha tak la ni thei tur talent kan dawng a nih dawn loh chuan kan che dawn lo.”
“James hian a rilru a thlak a nih chuan kan zavaiin kan lawm hle ang. Joel Embiid pawhin cham zel se a duhthu a sawi kan hre tawh. Mahse tunah chuan trade a chhuah a duh a, a chhuah theihdan tur pawh kan ngaihtuahpui ve tho.” tiin Morey chuan a sawi.
Morey hian tun season chawlhlaiin an roster atangin Jalen McDaniels, Shake Milton leh Georges Niang te an chhuahtir chungchang a sawifiah a. Team thuam thatna tura an chet theihnan an insiksawi ve a tul thu a sawi.
Tun dinhmunah star player Embiid leh P.J. Tucker te chiah 2024-25 season thlenga contract pek tlak vek tur nei awmchhun an ni a, a bak zawng erawh che thei vek an la ni.