Lashkar-e-Taiba firfiak pawl commander, kum li liam taa Jammu & Kashmir police atanga bânga firfiak pawla tel zui ta chu Pathianni zan zankhuaa police nena inbeihnaa thah hel pahnih zingah a tel.
Kashmir chhim lam, Shopian district-a inbeihnaa hi kum 2018-a Kashmir chhim lam tho, Zanipora khuaa police pali thahnaa inhnamhnawih a ni.
“Venhim hna thawktu leh an hmun te, civil mite beihna leh thalaite hruai kawia firfiak pawl zawm tura thawk nasa tak a ni a. Kum 2018-a Zainapora khuaa police pali thahnaah te, kum 2019-a Chittrigam, Shopian-a tual chhung mi ni lo lirthei khalhtu pahnih thahnaah te pawh a inhnamhnawih a. Amah avang hian Asif Lone, Khudwani, Kulgam leh Ab Rashid Thoker, Hussanpora, Arwani te pawhin firfiak pawl an zawm phah a ni,” tiin police thupuangtu chuan a sawi.
Kashmir police chief (IGP) Vijay Kumar chuan an mi thah hi Ishfaq Dar niin Abu Akram tiin an ko bawk a. Kum 2017 atang khan LeT firfiak pawl zinga che tan niin police, army leh Central Reserve Police Force (CRPF) tangkawpten beihpui an thlaknaah thah a nih thu a sawi.
Tanghova beihpui thlak hi Shopian-a Check Sadiq Khan velah neih niin a hmaa helai hmunah hian firfiak an awm tih thu an dawn bawhzuia che chhuak an ni.
IGP Vijay Kumar chuan Ishfaq Dar hi Jammu & Kashmir police pawh ni thin niin kum 2017 khan kum nga chuak a thawh hnuah bangin firfiak pawl a zawm tih a sawi a. Social media-ah silai a keng lai thlalak dahin hel a zawm tih a tar lang niin a sawi.
A ruala firfiak an thah hi Majid Iqbal a ni a, ani hi kumina firfiak pawl zawm chauh a ni a. An pahnih hian Shopian-a cheng ve ve an ni.
Police thupuangtu chuan an pahnih hian firfiaka chetna eng emaw zatah an inhnamhnawih tih a sawi a, Ishfaq hi firfiaka chhiar zinga mi a nih thu a sawi.
An kut atang hian AK-47 rifle pahnih leh a magazine pariat an hmu tel.