Aizawl : Congress Party chuan nimin khan Congress Bhawan-ah Wednesday Discussion programme an hmang a. He hun hi MPCC Treasurer Dr. Lalmalsawma, Nghaka’n a kaihruai a. Lalremruata Renthlei, Vice Chairman, Media Department MPCC leh Lalhmingthanga Sailo te’n thu an sawi.
MPCC Media Dept. Vice Chairman Lalremruata Renthlei chuan BJP-in thiam takin India ram mipui min chhimbudawi tih a sawiin, “New India an au pui a, hei hi Hindu lalram din tumna a ni a, in bumna a ni. Economy Policy mumal a nei lo a, Reform tiin Public asset an hralh vak vak a, India asset pawimawh ber ber te mi tlemte, mi hausa tawntaw te sangawizawnpuiin an hnenah a hralh vak vak a. Modi alo lan chinah India ram Economy a tlahniam char char,” a ti.
BJP in democracy nasa takin a pawngsual tih sawiin Lalremruata Renthlei chuan, “State tam takah ram tan hnathawk hlei thei lo khawpin sorkar lai an hawlh phel a. Ram mipuiin an tuar nasa hle. Parliament meuh pawh sorkar duh dan dana kaihher leh khalh a ni a,” tiin, court rorelna thlengin dikna awm thei lovin an in rawlh vek a. Media thununin BJP kalphung milin an kuaiher vek niin a sawi.
Remruata chuan, Hindu lal ram din tumtute chu Mizoramah a thenin an thawhpui a, a thenin thawhpui tumin an hel a, a then insawi fihlim tumin fianfiah vek theih sulhnu an nei mek tih sawiin, “Manipur buaina pawh BJP a ni. Nasa takin kan unau te’n an tuar mek a. Engtiang takin nge anni leh keini hian kan la tawrh zel dawn kan hre lo. Kan hnam a hima kan sakhua a him theih nan Congress kan mamawh a, kan ram tan, Kohhran tan, kan Society BJP an bansan a ngai,” a ti.
He huna thusawitu Lalhmingthanga Sailo chuan, MLA tha leh Minister tha tehna chu Hall, step, Field laih, damlo kan leh mitthi vui naa kal taima hi a ni thin. He tehna hi Pu Lalsawta kaihhruai Congress chuan a thiat mek a. Ram Economy siamthat tum si lovin Artificial Turf hmang sum siam lamah an intlan siak a, ram economy a that si lo chuan awmsia a awm lo tih a sawi.