Chanchinbumite chuan Delhi chheh vela lo neitu lungawi lo pungkhawmte chuan Independence Day lawmna neih laia tractor rally nei turin Delhi Police hnenah ziakin dilna an thehlut niin an tar lang.
Punjab leh Haryana atangin tractor sang chuang chu Delhi hualtu, Ring Road-a kawngzawh turin an inpuahchah a. Lo neitute hian Rajpath hmuna parade neih tur chu tihbuai an tum lo niin an sawi.
Nimin khan police-te hian he lehkha hi ngaihtuahin an thukhawm dawn nia sawi a ni.
Inrinni khan lo neitute hian Delhi Police hnen atangin kawngzawh phalna an hmu niin an sawi a; mahse, police chuan thu dik lo a nih thu an sawi ve nghal thung.
“Lo neitute hian ziakin dilna an thehlut lo va. An rawn thehlut a nih chuan kan inhriattir nghal ang,” tiin Delhi Police Commissioner SN Shrivastava chuan a sawi.
Sorkar laipui chuan Republic Day-a kawngzawh tum hi a helh hle a. Ram timualphotu a nih a hlau.