Aizawl : ZPM in nimin khan an party pisa-ah chhung inkhawm hun an hmang a, he huna thusawitu an Vice President Rev. Dr. K. Thanzauva chuan kalphung thar mipui sorkar an zuar a, eirukna tihbo an tum tih a sawi.
Rev. Dr. K Thanzauva chuan ZPM MLA candidate tura an thlan zawng zawng pawhin eirukna lakah an fihlim ang tiin an intiam a, he movement-ah hian eirukna nawr tawm a ni dawn tih sawiin, “Sum tam tak eirukna avanga luang ral thin hi tihbo a ni tawh dawn a, vawiina sum kan indaih loh em em na thin pawh a bo theih a beiseiawm hle,” a ti.
Kalphung thar an zawrhah chuan ram mipuite hmasawnna kawngah an bana kaih an ni dawn tih sawiin, “Kan hruaitute kal sual tur vengtu tur Val Upa Council kan nei lehzel te hian ngaih a ti ngam em em a ni. He revolution hi danglamna satliah a ni dawn lo va, anni pawh engmah an ni bik chuang lovang tia min sawina te hi hmanlai a chang tawh dawn a ni,” tiin ZPM Vice President chuan Chief Minister Works Department chang lo ngam an nei tawh dawn a, ani hruaina hnuaiah ram tha zawk, an la kal ngai lohna ramah he ram hi siam a ni dawn tih a sawi.
Mizoram political history ah revolution vawi hnih thleng tawhin, a tum thumna tur hi a thleng dawn nia sawiin Rev. Dr. K Thanzauva chuan, “Lal ban movement a thleng a, Mizo Union revolution tiin a sawi theih awm e. MNF Movement a lo chhuak leh a, Independent kan theih leh thiam dan danin kan sual a, tawrhna namen lo kan hmachhawn a.1972 UT pek kan ni a, political identity pek kan ni,” a ti a. ZPM chuan third revolution – siam thatna revolution siam turin an inbuatsaih mek niin a sawi.
ZPM chhung inkhawm hun hi Kapzawna, Adviser chuan a kaihhruai a ni.