Tun hnaia Manipur boruak a that loh chhunzawm zel avangin Mizo zirlai 30 chuang Mizoramah an rawn haw thla tawh.
The Zozam Times zawhna chhangin All Manipur Mizo Student Union President, Emmanuel Lalngaihmanawma chuan tun hnaia boruak sang chho leh mekah Mizorama pawl thenkhatin thuchhuah an neih leh Mizorama Meitei awmte an khaw lam an pan avangin Mizo zirlaite chu an mangang deuh a, Mizorama haw thla an awm nual tih a sawi a, Inrinni khan mi 13 chu Imphal atangin Mizoramah an haw a, Pathianni khan mi 27 chu an haw leh tih sawiin, heng mite hi RIMS-a medical zirlaite an nih thu a sawi.
Hetihlai hian Mizo zirlaite tan chuan tun dinhmunah han hlauhthawnna tur vak a awm lo nia a hriat thu Emmanuel Lalngaihmanawma chuan sawiin, Mizo zirlai awm tamna, RIMS campus pawh a him tih te, Mizoram sorkara home department hotute pawh an chanchin ngaichanga an biak pawh reng thu te a sawi a, Mizo zirlaite hian a hrana venhimna pawh an mamawh hran loa an ngaih thute a sawi bakah tuna Manipur-a la awm mek zingah chuan Mizoram pan tum an awm tawh rih lo nia an hriat thu a sawi.
Tar lan tawh thin angin Manipur state-a buaina a chhuah tan tirh Mau thla tir lam khan Manpura awm Mizo zirlai 200 dawn chu Mizoram sorkar hmalaknain hruai haw an lo ni tawh a, chung zinga a tam zawk chuan class tan leh turin May thla tawp khan Manipur-ah hian an let a, zirlai thenkhat, July thla tir lama Manipur-a let lehte pawh an awm a ni.