Manipur-a tual chhung buaina chhuak mek kaihhnawiha tun hnaia Mizorama awm Meitei an khaw lama haw chu mi 500 an chuang tawh a, hetihlai hian Mizoram Police DGP-in Meitei zingah vau tawk an awm lo a, an hlauh avanga haw an nih thu a sawi.
Tun hnaia Mizorama Meitei-te fimkhur tura tihna lam hawi thuchhuah awm leh Meitei awm zat chhiar tumna thawm a awm avangin Mizorama awm Meitei-te hian Mizoram chhuahsanin an khaw lamah an haw a, Mizoram Police-in an chhinchhiah chinah tun hnaia an khaw lama haw Meitei hi mi 520 an tling tawh a. Meitei-te hian Lengpui Aiport atang bakah Vairengte paltlangin Mizoram hi an chhuahsan a ni.
Thudawn danin, hnathawhna leh zirna avanga state pawn mi, Mizorama Meitei awm hi an vaiin mi 10,000 chuang an ni a, chhungkua ang chuan 416 an ni a.
Hetihlai hian Mizoram Director General of Police Anil Shukla chuan Mizorama Meitei awm an khuaa haw duhte chu a tul angin venhimna an pe tih nimina chanchinbu mi thenkhat a kawmnaah a sawi a, Manipur leh Assam DGP-te nen an inbepawp reng tih a sawi bawk.
DGP chuan Mizorama awm Meitei-te zingah vau tawk an awm a hriat loh thu sawiin, hetihlai hian thenkhat erawh an hlauh avanga haw an awm tih a sawi a ni.
Manipur-a tual chhung buaina a chhuah tan tirh, May thla tir lamah khan Meitei eng emaw zatin Mizoram an lo chhuahsan tawh a; mahse, rei vak lovah Mizoramah an kir leh a. Mizoram chhuahsantute pawh hi an him loh vang ni lovin Manipur-a an chhungten an ngaihtuah lutuk a, haw tura an tih avanga kir an ni tlangpui tih thu dawn a ni.