NGO Co-ordination Committee-in Manipur-a Zohnahthlakte thlavang hauhna kawngzawh an buatsaih turah political party tinten an thlawpzia lantir nan vawiin hian an pisa theuh an khar dawn.
Thawhtannia Mizo Hnam Run chhung inkhawmah MNF President Zoramthanga chuan NGOCC-in Manipur-a Zohnahthlak unaute thlavang hauhna, an tawrhna tawrhpuina, anmahni thlawpna kawngzawha tel turin MNF zawng zawngte a sawm a. Mizo Hnam Run pawh khar tur a nih thu a puang.
Mizoram Pradesh Congress Committee (MPCC) pawhin Mizoram puma ‘Zohnahthlak unaute thlavang hauhna’ kawng zawh huaihawt tum chu ngai pawimawh a, theihtawpa tawiawm nise tia an lo rel tawh avangin Congress Bhavan chu khar a ni dawn tih circular an tichhuak a, he kawng zawhah party mi a tam thei ang ber tel turin an inngen.
Congress Thalai, MPYCC pawhin thuchhuah siamin Manipur-a Zohnahthlakten harsatna an tawh mek tuarpuina lantir nan leh an thlavang hauhna kawngzawh huaihawt turah MPCC-in a thlawp thu leh tawiawm vek tur a thu a lo chhuah tawh angin, MPYCC pawhin thlawp tih an tar lan bakah, district hrang hrang-a an member zawng zawngte pawh lo thlawp a lo tawiawm turin an inhriattir.
ZPM pawhin thuchhuah an siamah kawng neih tur hi an thlawp thu leh an thlawpzia leh a tuartute an tawrhpuizia lantir nan party pisa an khar dawn tih an tar lang a. ZPM mi leh sa zawng zawngte kawng zawhnaa tel vek turin an inhriattir bawk.
BJP Mizoram President Vanlalhmuaka pawhin nimin an party pisa-a chhung inkhawm an neihah, NGOCC-in ruahmanna an siam anga mahni veng atanga mahni remchan anga kal theuh turin an inhriattir thu leh, Zohnahthlakte thlavang hauhna kawng zawh tur a nih vangin BJP Mizoram State Office pawh khar tur a nih thu a sawi.
NGOCC hmalaknaa Mizoram hmun hrang hranga kawng zawh turah hian zawh a nih chhung hian Aizawl khawpuiah city bus an tlan dawn lo.
NGOCC huaihawta kawng zawh hi Aizawlah chuan chawhma dar 11-ah tan a ni ang a, Chanmari kawn leh Kulikawn atanga kawng zawh tanin, Raj Bhavan Hmar lam gate-ah intawhkhawmin, he hmunah hian inkhawm neih chhunzawm a ni ang a, tlawmngai pawl hrang hrang aiawhten thu an sawi dawn a ni.