Formula 1 world champion ni lai Red Bull Racing in record thar an siam a. Tun season an thunun hneh tak chu chhunzawmin a zawna vawi 12-na atan hnehna an chang.
Pathianni zanah Hungarian Grand Prix tlan niin world champion ni lai Max Verstappen chuan fal taka pakhatna hauhin tun season intlansiakah Red Bull Racing hian pakhatna an la luah vek.
Nikum season kharna Abu Dhabi atanga chhiarin a zawnin vawi 12 an chakna a ni a. Kum 1988 a McLaren in driver ropui pahnih Ayrton Senna leh Alain Prost te an kawllai a record an siam chu an pel a ni.
Season ropui
Tun season F1-ah Red Bull leh Verstappen elpha an awm lo. World champion driver hian driver angin hma a sawn belh tih a chiang. Driver tha ber leh car tha ber an neih avangin Red Bull elpha an awm lo.
Hungary a Hungaroring tlankawngah Verstappen hian qualifying kalphung thlak danglamna tur enchhinnaah ni dang ang lo takin a hmasa ber a luah lo. British driver Lewis Hamilton chuan F1 a pole position a chan vawi 104 ni turin a che tha ber.
Tunhnai intlansiak hnuhnung pahnih chhunga ‘car upgrade’ awmze nei a hmang McLaren bawkin intlansiak tan tirah Verstappen an tibuai. Pathumna leh palina atanga tlan chhuak Lando Norris leh Oscar Piastri ten an tlan tan atangin nawr viau mahse kawi khatnaah Verstappen-a’n hma a hruai. Tuman an pel leh tawh lo.
A hnungah kum 23 mi Norris-a’n a zawna vawi hnih nan pahnihna a hauh a. Pakuana atanga bul tan Red Bull driver dang Sergio Pérez chuan pathumna a hauh pha bawk.
Red Bull in tun season intlansiak 11 tlan tawhah pakhatna an hauh vek a, Verstappen hi a zawna vawi sarih a chakna niin tun season-ah vawi 9 a chak tawh. Perez-a’n tum hnih hnehna a chang ve bawk.
Tun dinhmunah an car leh an driver-te thlirin intlansiak la hmabak zawng zawngah an chesual a nih loh chuan hneh thei an awm a beiseiawm lo.
Red Bull an lawm
Verstappen chuan, “A zawna vawi 12 chak hi thil ropui tak a ni. Tunhnai kum hnih chhunga kan hnathawh a tha tak zet. Hei hi hun rei tak atan kan chhunzawm zel theih ngei ka beisei.”
“Kan team a kan thawhhona hi a tha a, kan team boruak nuam hi kan chakna a ni.” tiin a sawi.
Team boss Christian Horner pawhin, “McLaren ropuina kan hmu tawh thin a, team anga kan pel thei hi kan tan chuan a hlu tak zet a ni.” a ti ve bawk.