India ram chu furpui na takin a nuai mek a, mi 135 chuang tui lian leh lei min avanga thi awm tawhin chhanchhuah hna thawktute chuan chin hriat lohva awmte chu ngawrh takin an zawng zui mek zel bawk.
Ningani atang tawh khan khawthlang lam vaukamte chu ruah sur nasa avang hian an buai tawh a. India Meteorological Department chuan ni rei vak lo chhung chu ruah a la sur zui dawn niin an sawi lawk.
Maharashtra-ah bik mi 114 an thi tawh a, heng zinga 40 hi Mumbai chhim lama tlanga khaw awm, Taliye-a Ningania lei min avanga thite an ni.
Khuaa cheng pakhat, a chhungte pawh an chin hriat lohva la awm mek, Jayram Mahaske chuan lei minin an khua a hnawl laia tlanchhiat tum tak tak chu lei tawlhin a lak thu AFP news agency hnenah a sawi.
Hun reilo te chhungin chenna in zawng zawng deuhthaw hnawlin in pahnih chiah a ding tawh a, power supply a chhe vek bawk niin tual chhung mite chuan AFP hnenah an sawi.
Mi 99 vel chin hriat loh an la awm avangin chhanchhuah hna thawktute chuan lei leh in chim hnawk karah an la zawng mek.
Taliye khuaa chhanchhuah hna thawka awm, National Disaster Response Force Inspector Rajesh Yawale chuan, “Ka team pumin kan bei a ni,” a ti a. Ruang an lak chhuah thenkhat chu khaw hnuai lama thingkung kara lo tangte a nih thu a sawi.
Mumbai chhim lama hmun hniha lei minah mi eng emaw zat an thi bawk.
Chiplun-ah chuan Ningania darkar 24 chhung zet ruah tam tak a sur hnuah tui chim chin chu feet 20 dawn a ni hman a, kawngpui leh in tam tak a chim.