Hman lai atang tawhin khawvelah hian ram inchuh hi mihringte kalphung emaw tih mai tur a ni a. Khawvel indona zawng zawng hi ram inchuhna ani kan ti thei ang. Ram zau leh lian ten an ram zauh zel an duh a. Ram tenau deuh chu lem zawh mai hi an tum pakhat a ni a. Kan hmuh mek angin tunah pawh khawvela ram nei zau ber Russia chuan a thenawm ram Ukrain a chuh a. An indo mup mup mek a. Ram leh ram bakah ram hrang hrang chhungah hnam leh hnam, state leh state pawhin ram an la inchuh zel a. Heng zawng zawng hi mahni hnam emaw, mahni ram emaw chawilen leh tih ropui kan duh vang ani vek a. Mihringin duh khawp a nei lova. A nei sa in a aia tam an duh a, a nei tlemin neih tam ve an duh tih hi mihring nuna ze awm sa tlat a ni.
India ramah pawh tunah hian Assam leh Meghalaya, Assam leh Nagaland, Assam leh Mizoram ten a zau kan duh vek. Manipur leh Nagaland inkar pawh chuti tho chu an ni.
Keini dinhmun hi en ila, kan ram chu India ramah mihring thawlna ber pawl kan ni. Mahse, kan ram awp mek chhungah kan duh tawk hauh lo. Manipur leh Assam lama kan unaute chenna chin chu kan ramah rin luh kan beisei ve reng bawk.
Ram leh hnam ropui nan hian ram lian leh mihring tam a ngai a. Mizoram mihring cheng hi ropui tur chuan kan la tlem em em a. Chuvangin kan unaute lo haw khawm hi kan nghakhlel a. Chumi ruala ram zauh hi kan mamawh bawk a ni. Dik lo taka mi ram chuh tur kan ni lova, hmanlai atanga kan chenna ram a ni a. Kan rama rin luh hi kan tih makmawh ani bawk. Kan ram zauh nana kan indo mek a. Manipur lama kan unaute chuan nunna thapin ram an veng mek a. A thih pawh an thi tam tawh khawp mai. Indona chuan thil chhe tinreng a keng tel an tih thin angin rawng tak taka inthahna, lu in lak sak, pawngsual rapthlak pui pui an tawk mek. Mahse, kan unaute hi tawlh thei an ni lova. Mihring tam zawk leh ralthuam nei tha zawk an hmachhawn mek.
Hetih lai hian keini muanglei awmte hian tih ve tur kan nei a. Chu chu kan ram tana beitute tihchak a ni. Anni tichak tur hian silai kan lek ve a rem rih lo. Mahse, an mamawh ei leh in kan thawn luh a ngai a. Ei leh in bak pawh kan thawn luh a ngai a. Kan sawrkar tan engkim thawn luh a rem kher lo. Mipui hian an mamawh leina tur a tam thei ang ber thawn luh i tum ang u. Chu chu mizo hnam ropuina tur ani tih hriain i tang sauh sauh ang.