BJP Mizoram Preadesh thupuangtu K.Laldinthara’n MNF party-in BJP kaihhruai National Democratic Alliance (NDA) atangin an inhnuhdawh ngam an ring lo a, ZPM party-in NDA hnuaiah tel hram an duh tih nimina press conference an neihnaah a sawi.
Aizawl Press Club-a thuthar thehdarhtute a kawmnaah K Laldinthara chuan, MNF party president-in NDA chhuahsan mai pawi ti lo anga a tawng chu a invaukhan vena maia an ngaih thu a sawi a, MNF party chu leh lama awr dum a, awr sen kualah a puh.
BJP thuphuangtu chuan MNF hruaitute chu Delhi-ah chuan an NDA em em a, Mizoramah chuan BJP do ber angin an awm leh tih sawiin, “Hemi avang hian kumin kum tawpa inthlanpui neih turah hian an dinhmun tur hi Delhi lama kan hotuten an ngaihtuah mek,” a ti a, BJP an mamawh dan thlirin MNF party chu NDA atangin engti kawng mahin an inhnuhdawh an rin loh thu a sawi.
ZPM party pawhin NDA hnuaia tel hram an duh a, an hotupain NDA zawm a duh thu voice record-te pawh a awm thu sawiin, “Mizorama regional party-te hian NDA-a tel hi an duh vek a, thenkhatin Mizoram BJP hotute min rawn bepawp a, direct-a anmahni lo inzuk hai ven tuma NDA-a tel tumte hi an awm ngei tih hi ka puang duh a ni,” a ti a; hengte avang hian kumin inthlanpui neih hunah BJP tel loin sorkarna a piang dawn lo a, sorkarah an tel ve ngei dawn tih a sawi.
BJP Mizoram thupuangtu chuan sorkar laipui scheme hrang hrangte chu Mizoram mipuiten chhawr tangkai thei se an duh thu sawiin, PM-Kisan Nidhi hnuaiah lo neituten chhawmdawlna an dawng thei a, tunah hian tanpuina chu a dil theih mek a, ngaihven turin lo neitute an ngen tih a sawi a. Central scheme-te hi state sorkarin vote zawn nan hman tangkai a lo tum ve thin thu a sawi bawk a ni.