Myanmar-a sipai sorkar chuan mipui thlan lalte hnen atanga thuneihna an chhuh hnuah, anmahni duh lohna nasa taka mipuiin an lantir mek laiin, an inhui khawmna hmanrua ber, Facebook leh social media platform dangte chu nimin atang khan a dangchat (block) hmiah.
Facebook hi Myanmar mipui zahve, mi maktaduai 53 velin an hman niin Thawhtannia sipaiten thuneihna an chhuh hnuah khan anmahni an duh lohzia lantir nana an hmanrua ber a ni a, sorkar thar thu awih lo tura an infuihna, an chet dan an inhrilh tawnna ber a ni.
Ministry of Communications & Transport chuan social media khuahkhirhna hi Pathianni thleng an kalpui phawt dawn tih a puang.
“Tun dinhmunah hian mipuiten kan ram dinhmun an tibuai mek a, thu dik lo thehdarhin Facebook hmang hian mi an hruai kawi nasa a ni,” tiin ministry hian khapna thupek an chhuahah an tar lang.
An ram hruaitu hlui ni ta, Aung San Suu Kyi-i chu an ram chhunga lak luh phal loh inbiakpawhna hmanrua a kawl niin an puh a. United Nations chuan sipaiten thuneihna an chang ta chu tha lo tak zet a tih thu a sawi.
Khawvel huapa online service viltu, NetBlocks chuan Facebook, Instagram, Messenger leh WhatsApp chu sorkar internet provider MPT-in an khap tak avang hian provider dangah mi an pakai mek niin a tar lang a. VPN hrang hrang hmang kualin an danchah lohna an zawng.
“Facebook-in a tihchhuah thil hrang hrang chu Myanmar-a internet provider hrang hrangin an block hlawm,” tiin Netblocks chuan Twitter-ah a tar lang.
Facebook hi Instagram leh WhatsApp neitu an ni bawk a, Myanmar ramah hian hmangtuten harsatna an tawh ngei thu an sawi.
Facebook thupuangtu, Andy Stone chuan thuneitute chu khuahkhirhna thlahdul turin a ngen a, “Myanmar mipuiten an chhungte leh an thian thate an biaka thil pawimawh an hrilhna a ni,” a ti.
Myanmar-ah hian Facebook hi miin an mobile phone hmangin an hmang mai a, sumdawnna lam leh sorkar pawhin a hman tangkai tak a ni a. Chutih rualin thu dik lo thehdarhna leh mi pawisawina hmanrua atan pawh an hmang nasa hle.
Suu Kyi-i hi National League for Democracy (NLD) dintu niin an khawpui, Nay Pyi Daw-a a chenna inah hren mek a nih thu an party hian an sawi a; mahse, sipai general-te chuan khawiah nge a awm an sawi ve lo.
NLD hian November 8, 2020 inthlanah khan vote 80 chuang lain hnehna an chang niin election commission chuan a puang a; mahse, sipaiten an pawmpui lo va, inthlanah dik lo tam tak a awm tiin tuna thuneihna an chan pawh hi hemi nghawng zel hi a ni.