- Ruata
Hyundai chuan an SUV lian leh changkang pahnih Creta leh Alcazar chu a chi thar Adventure Edition an tlangzarh a, Adventure Edition Creta hi Rs. Nuai 15.17 man niin Alcazar hi Rs. Nuai 19.04 a ni thung a, hei hi ex-showroom man ve ve a ni.
Hyundai Creta hi special edition a chhuah vawi hnihna a ni a. A hmain Knight Edition a chhuak tawh a. Alcazar tan chuan special edition a chhuah vawikhatna a ni thung a ni. Creta Adventure Edition hi petrol khawl hmang chauha tihchhuah a ni a, hetihlai hian Alcazar-ah chuan petrol leh diesel khawl hmang a awm ve ve thung dawn a ni.
Adventure Edition-ah chuan eng nge kan hmuh dawn?
Heng adventure edition Hyundai SUV pahnihte hian dashcam (dashboard-a camera awm) an nei dawn a. Grille dum an nei a, Hyundai logo pawh rawng dum veka duan a ni. A hma, a hnung leh a sira skid plate ho hi rawng dum a ni bawk a. Wing mirror a nei a, hei bakah hian 17 inch alloy wheel, fog lamp housing leh thildang hrang hrang kan hmu bawk a. Adventure badge a awm vang bawk a ni.
Adventure Edition-ah hian Ranger Khaki rawng duhthlan tur a awm bawk a. He rawng hi Exter-ah pawh kan hmuh tawh ang hi a ni a. Heng bakah hian Abyss Black, Atlas White leh Titan Grey te a awm bawk a ni. A chhunglamah chuan Adventure Edition ho hian all black interior a nei a, rawng hringin an chei bawk a ni. A seat pawh rawng hringa chei vek a ni a, a chhuat chi thar neiin silver pedal a nei bawk a ni.
A khawl lam
Tarlan tawh angin Creta Adventure edition hian 1.5-litre petrol khawl, 115hp power leh 144Nm torque pechhuak thei a hmang a. Hei hi SX trim hoah awmin 6-speed manual gearbox leh SX (O) trim-ah CVT duhthlan tur a awm bawk a ni. Alcazar Adventure edition thung chuan 160hp power leh 253Nm torque pechhuak thei, 1.5-litre turbo-petrol leh 116hp power leh 250Nm torque pechhuak thei, 1.5-litre diesel khawl duhthlan tur a awm a, mi 7 a chuan theih bawk a ni. Alcazar Adventure edition hi Platinum trim-ah 6-speed manual gearbox hmangin petrol leh diesel engine hmangah duhthlan tur a awm a. Signature (O) trim Adventure edition-ah chuan 7-speed dual-clutch automatic chu petrol hmangah a awm a, 6-speed automatic chu diesel khawl hmangah duhthlan tur a awm bawk a ni.
Elpui tur te
Creta Adventure edition hian Lava Blue edition leh Matte edition Skoda Kushaq, bakah GT Edge Limited edition Volkswagen Taigun te a el dawn a. Hei bakah hian Maruti Suzuki Grand Vitara, Toyota Hyryder, Kia Seltos, MG Astor leh chhuak har tawh lo tura beisei Honda Elevate leh Citroen C3 Aircross te a el thei dawn bawk a ni.
Alcazar Adventure edition hian Tata Safari special edition hrang hrang – Dark, Red Dark leh Adventure te a el thei ang a. MG Hector Plus leh Mahindra XUV700 te a el thei bawk.
Hyundai Creta leh Alcazar hi SUV changkang leh hralh kal tak an ni a. A bik takin Creta hi passenger phur lirthei hralh kal zual top 10-a lang reng a ni a. Tuna an special edition thar hian Hyundai lirthei ngainatute pawh a tihlawm viau beisei a ni a, market lamah pawh Hyundai hian hma an sawn pui ngei a beiseiawm a ni.