Kumin kum tawp lama Mizoram legislative inthlan tur zet chu kan urlawk hma hle mai. Party tinin campaign rusum an thlak a ni tawh ringawt mai a. Lawmluh, bang tih vel in social media a luah tam em em a. Pawm chin tur pawh hriat hleih theih loh lekin an inziah uar siak bawk. Engpawh nise, felfai takin kan inthlang chho turah ngai ila.
Hetiang taka tan an lak tawh lai hian party te hian an policy leh programmte mumal tak an la tlangzarh mumal lo viau mai a. Congress lam hian tang puihna tih an tlangau pui a. ZPM lam hian kalphung thar an ti a. Congress in Tang puihna an tih hi kuthnathawktute puihna turah lo ngai ta ila, eng ang chiahin nge an puih ang tih hi hei aia chiang lehzual hian mipui min hrilhfiah thei se.
Chutih rualin ZPM lam pawh hian kalphung thar chu engnge anih chiah, engnge an programme leh roadmap te tar chhuak thei se mipui tan an lam hawi tur chi nge, rin ang he hu an lo ni dawn lo kan ti zawk dawn tih min hrilh hi an tih tur hmabak ani bawk. Tin, ruling party lam pawh hian sawrkar tharah chuan tuna an kaldan ngai an la ring dawn nge, kum nga an sawrkar hnuah hian step thar an tuk dawn tih pawh an puan a ngai bawk ang. Tuna an sawrkar kalphungah hi chuan mipui hian kan khawpkham lo tih hre tel bawk se.
Mizoram hian changkan lam pan kan duh tawh a. Chutih rual chuan kan political party te pawh hian an tihdan hlui ngawta min campaign khum lo hian, mipui lamin chiang taka an road map te pawh hriat ve kan.mamawh tawh a ni. Kan sawrkar thar tur chu mipuiin engnge an tihdan tur chiah hriat hi kan ram hmasawnna tur ani bawk. Ram changkangah chuan healthcare system eng angin nge mipui min hruai dawn, kan education lama kaldan tha zawk kan hmu dawn em, kan economy chawikang turin mipui hi zuan luh chatna tur min kawhhmuh tur a ni. Kan tlangram lo neih hi tha an la ti tawk em, tha an la ti anih chuan engthlai nge kan sum lakluh nan min hman tir an tum, eng industry nge promote an tum hriat vek theih a duan sa min han hlui teh se.
An kal dan tur lo hriattir lawk sa hi mipui laka an bat a ni a. Party campaigner kan hmuh chuan heng hi mipui pawhin i lo zawt chat chat teh ang u. Tang puihna, Kalphung tih vel mai maia chhaih lunglen hman kan ni ta lo e. Kalphung tharah chuan engnge kan hmuh tur, tang puihnaah pawh tute nge puih tur hi hriatfiah kan duh e. MNF a lo sawrkar nawn pawhin beiseina thar emgnge awm dawn, beiseina nen i thlir leh phawt ila.