California-ah Pathianni chhun khan vantlang chenna hmunah thlawhna tê chi a tla a, a khalhtu leh leia a delh ina lo awm mi 4 an thi.
Engine pahnih hmang chi thlawhna hi a thlawh laiin a kang a, a puak zui a, a phel a. Los Angeles daia Yorba Linda-ah a tla a ni.
He thlawhna hi a bul hnai lawk, Los Angeles atanga km 32 vel chaughva hla atanga thlawk chhuah a ni a. A chhuah hnu lawkah a chesual zui ta a ni.
Mi 5 an thih bakah hian mi dang 2 pawh nasa takin an kang a, damdawi inah enkawl mek an ni tih thuneituten an sawi.
Tualchhung mite chuan Pathianni chhun dar 1:45 vel (India rama nimin tuk dar 3:15) khan vansanga thil puak an hmuh thu leh a hnu lawkah in chhawng hniha sang chungah a tlak nghal thu an sawi.
Cessna 414A thlawhnaah hian a khalhtu chauh a chuang a, Fullerton Municipal Airport atanga thlawk chhuak a ni a, a tlakna inah mi hmeichhia leh mipa 2 ve ve a delh hlum niin Orange County thuneitute chuan an sawi a. A tlak chhan hi an la hre thei lo va, an chhui zui mek.
Thlawhna hi lian tak takin pali-ah a puak darh tih National Transportation Safety Board-a mi, Eliott Simpson chuan a sawi a. Kangthelhtu mi 72 zetin a kang hi an thelh a ni.