Greece prime minister chuan rama ram kangin zual lam a pan mek zel laiin ‘nipui rapthlak tak’ an tuar tih a sawi.
Mi sang tel an chenna in atangin hmun himah suan chhuah an ni a, kangthelhtu 1,000 chuangin ram kang thunun tumin an bei mek bawk.
Greece ram hian kum 30 chung hnua khaw lum ber hun lai an tawng mek.
Thuneitute chuan ram bial dangah pawh kangmei a chhuak thei reng a nih thu sawiin, heng zingah hian Athens leh Crete pawh a tel.
Prime Minister Kyriakos Mitsotakis chuan sorkarin a ngaih pawimawh ber chu mihring nunna chhan a nih thu a sawi.
Ni 10 chhungin ram hectare 56,000 chuang a kang tawh niin European Forest Fire Information System chuan a sawi.
Darkar 24 liam ta pawhin hmun tam takah ram a kang thar a. Heng zingah hian an thliarkar lian ber pahnih, Evia bakah Peloponnese an tih ram bial, Arkadia leh Olympia khaw awmna, Olympic Games intanna hmunte pawh a tel.
Evia atang hian lawngin mi 2,000 chuang an insaseng tawh a. Thliarkar hmar lama Pefki atangin lawng 10 inringin puih ngai an awm chuan che chhuak turin an inpeih tih Coast Guard thupuangtu chuan AP news agency a hrilh.
Inrinni khan Athens hmar lam, Mount Parnitha-a ram kang chuan khawpuiah mei a tikhu nasa hle a. Thuneitute chuan thawkna lama harsatna neih phah tan biakpawhna tur line an siam niin AP chuan a tar lang.
An khawpui ber daia kangmei vang hian mi sang tel chu Ningani atang khan an insuan chhuak tan a; mahse, Inrinni atang khan a rem deuh hret a. Mahse, thli thaw tur hmuh lawk a ni a, a inman kai thar leh thei reng.
Mi cheng pakhat, a car park-a a bialnu nena awm chuan an in sak thar chu zan khat chiah an luah hman tihin an tlanchhiatsan a ngai tih a sawi.