India-a parliament chuan Prime Minister Narendra Modi-a sorkar rintawk lohna (no-confidence motion) lut chu sawiho mek a ni.
Congress party MP Gaurav Gogoi-a’n rintawk lohna hi July 26 khan a pu lut.
Dan siamtute hian an sawiho zawh hnuah Ningani hian vote an thlak ang.
Modi-a sorkar hi chak lo tur an ni chuang lo va, BJP leh a thawhpuite hian hnehna chang turin parliament-ah member an ngah tawk.
Eptuten rintawk lohna pu luta sawiho an duh chhan ber hi Manipur-a chi leh chi inkara buaina awm mek chungchang Modi-a’n a sawi chhuah ngei theih nana an tih a ni.
A pu luttu, Gogoi-a hian rorelna ina ‘Modi-a a ngawi tlat an tawngtir’ theih nan a nih thu a sawi a. Engvangin nge Modi-a hian hmarchhak state hi a tlawh duh miah loh tih a zawt bawk.
Parliament thutkhawm neih mek hi July 20 atanga tan kha a ni a, neih tawh chhungin eptute chuan Manipur-a tharum thawhna thleng chungchanga a ka ântir tumin an nawr ngar ngar.
May thla tir atanga buaina chhuak tawhah hian mi 150 vel an thi tawh a. A mi cheng tam ber, Meitei leh tribal Kuki an intibuai a ni.
Union Home Minister Amit Shah chuan sorkar hian he thil hi sawiho an inpeih reng tih a sawi a, eptute zawk hi an ‘tlanchhia’ niin a sawi.
Rorel inkhawm mumal theih loh karah hian bill pawimawh tak tak pawm a ni tho va, hengte hi buaina avang hian sawiho mumal loh a awm nual.
Congress hruaitu, Thawhtannia MP atana dah that leh, Rahul Gandhi-a chuan Thawhlehnia sawihona hi a hawn rin a ni a; mahse, Nilainiah zawk chauh a tawng ve dawn nia sawi leh a ni.
Tun hi kum 2014 atanga sorkarna a chelh hnua Modi-a sorkarin no-confidence motion a hmachhawn vawi hnihna a ni a. Kum 2018-ah khan Andhra Pradesh hnena special category status pek chungchangah put luh a lo ni tawh a. Hemi tum pawh hian darkar 12 chhung sawiho a nih hnuah buk a ni a, sorkar a chak.
Tun tuma sorkar rintawk lohna sawihona hi tun hnaia eptu party 26 zette an inhlawm khawm thar, INDIA-in an inpumkhatna an tihlan theihna remchang hmasa a ni a. July thlaa indin chauh pawl hian Modi-a BJP sorkar hi nakum inthlanpuiah paih thlak an tum a ni.
A sorkar rintawk lohna chungchang sawihonaah hian Modi-a pawh hi Ninganiah a tawng chhuah ve rin a ni.