Manipur police chuan tharum thawhna thlen nasatna district atanga sawn chhuah an nih hnu lawkah Assam Rifles lakah thubuai an siam.
Police hian central paramilitary force lakah thubuai an siam hi Inrinni kal taa Bishnupur district-a thil thleng kaihhnawih kha niin mi pathum thattu nia an hriatte an umzui laiin an man theih loh nan hma an lo la niin an puh.
Union home ministry hnuaia awm, Assam Rifles hian an laka thubuai ziah luh chungchangah hian engmah an la sawi lo.
FIR-a a inziah luh dan copy darhah chuan thubuai hi August 5-a ziah luh kha a ni a, Manipur police leh Assam Rifles sipaite inhnial lai video social media-a a darh hnu lawka ziah a ni.
Video darhah hian Manipur police commando-te hian Assam Rifles sipaite chu an beihpui thlaknaah inrawlhin hel man tuma an beih laiin a tibuai zawngin an lo che niin an puh a, an inhnial nasa hle.
Thla thum kal taa buaina a chhuah atang khan Manipur-ah hian a hma pawhin Assam Rifles leh Manipur police commando-te hi an lo inbakkaih fo tawh a, social media hrang hrangah a lo darh nual tawh bawk.
“Pholjang kawngpui hrul, Kwarka Ward 8-a Kutub Wali Masjid kan thlenin state police team hi lo tihdin kan ni a, 9 Assam Rifles-ten Kwakta Pholjang kawngah kaltlang theih loh nan an Casper lirthei an lo hung a, dan anga kan tih tur kan tihna tur an lo tibuai a ni,” tiin Bishnupur district-a Phougakchao Ikhai Police Station-a officer in charge chuan FIR a thehluhah a ziak a ni.
Meitei duh angin checkpoint pawimawh venhimna siksawi
Chi leh chi inkara buaina chhuah mekna, Manipur-ah hian venhimna lama insiksawina lian tak a thleng a. Checkpoint pawimawh tak, Moirang Lamkhai, Bishnupur district-a Assam Rifles duty dah thinte chu Meitei nuhovin nasa taka duh lohna an lantir hnuah CRPF hmanga thlak an ni ta.
Meitei nuho hian phai district hmun hrang hrangah central paramilitary force-in civil mite lakah nasa takin nunrawnna an lantir nia puhin sawn chhuak tura nawrna an huaihawt a ni.
Additional Director General of Police (Law & Order) chuan Thawhtani zan khan venhim hna thawktute insiksawina tur hriattirna hi chhuahin police leh CRPF unit-ten Bishnupur-Kangvai Road-a duty mek, 9 Assam Rifles-te an thlak dawn tih tar lan a ni.
Manipur-ah hian thla thum chuang chi leh chi inkara buaina a chhuah tawh chhung hian Assam Rifles leh Manipur police commando inkara inrem lohna awm avanga an inhnial buai lai video eng emaw zat social media-ah a darh tawh.
Meitei hmeichhe pawl, Meira Paibi chuan Thawhtanniah khan Manipur phaia district pangaah Assam Rifles an duh lohna hi an lantir a, paramilitary force hi Meitei mipui lakah an ‘râwng hle’ niinan sawi.
Hmeichhe tam takin placard leh banner kengin nilengin phai district panga – Imphal East, Imphal West, Thoubal, Bishnupur leh Kakching atanga Assam Rifles lak chhuah an nih an duhzia an lantir a, an laka an lungawi lohna an lantir nghal bawk.
Hmarchhak state-a Meitei leh tribal hnam pakhat, Kuki inkara May 3 atanga tharum thawhna thleng mek zelah hian mi 170 vel an thi tawh a, chenna in leh lo leh sakhaw hmun tam tak tihchhiat a ni a, mi sang tel sahimna zawngin an tlanchhe tawh.