- Laiu Fachhai
Latin tawnga quid pro qua an tih chu duhsaktute duhsak letna a ni a, party politicsah chuan quid pro qua hian, “Kan party member ni la, min vote chuan, chutiang thil chu kan tihsak ang che,” tihna a kawk a ni. Tichuan an party member mimal leh chhungkuate hnenah chuan pawisa fai, scheme, contract, sawrkar hna leh loan te tiamin an quid pro qua a, an party votetu sawrkar hnathawkte chu an hna tinghet, promotion pek leh hmun tha zawk leh department tha zawkah te sawnin an duhsak let thin. Khawtlang, bial leh district te erawh chu hmasawnna project leh programte an tiam a, quid pro qua politics khelh khum an nih tlangpui.
Quid pro qua politics hi votebank politics a nihna lai a awm. Kan rama quid pro qua politics langsar zualte chu New Land Use Policy (NLUP) leh Socio-Economic Development Policy (SEDP) programte hi an ni ti ila kan sawi sual em lo ang. A lang a pau (overtly) chuan quid pro qua-in kalpui ni lo mahse, a lang lo (covertly) ah chuan, vote zawn nan leh party mi leh sate duhsak letna quid pro qua sum sem a nihzia chu tawnhriat leh tlang hriat a ni.
Sawrkar hmasa khan NLUP kha an flagship program atan hmangin chhungkaw tamtak hnenah NLUP sum chu an sem a. Hlawkpuitu leh dinchhuahpuitu eng emaw zat chu an awm ang. Mahse a dawngtu nawlpuite erawh chuan sum lakluhna (income) nghet nei theihna tur khawpin an dinchhuahpuiin a lang lo. Thil kal fuh lo leh dik loa lang chu, a sum a beitham hle chu thu hran ni sela, a dawngtu mipui nawlpuite kha business thiam lo leh tui lote an ni hlawm vang ni beirin a lang. A dawngtu Kristianten sum lamah an rinawm lohna leh hnathawh an taimak tawk lohna vangte pawh a ni ve ang. Chu chauh a ni lo. Sawrkar lam atang pawhin enpuina leh endikna (monitoring leh evaluation) an tlakchham vang a ni ve thei bawk.
Tamtak chu NLUP program-in a tum anga hlawhtlinpui thei tura beisei awm lem lo an nihna chungin, quid pro qua politics avangin pek an ngai ta a ni. Chuvangin program ina a tum anga an kalpui lo leh an hlawhtlinpui lo pawhin, sawrkar chuan an en liam mai niin a lang. Economics lam hlawhtlinpui lo chauh ni lovin, NLUP program leh sum khan Kristian moral leh nun pawh a chhe zawngin a nghawng nasa a ni. Dawng duh Kristian tamtakte chuan first installment leh installment dangte an dawn theihna turin, an nei lo leh an tih lote nei ang leh ti anga dawta report a, phuahchawp sum hmanna Utilization Certificate (UC) lem siam pawi tih lohna thlengin an Kristian nun a kal sual tir thei a ni.
Quid pro qua NLUP sum khan khatiang khawpa Mizoram mipuite moral a tichhia a, rinawm lohna, dawt sawina leh eirukna sualah mi tamtak a luh tirzia kha hre rengin, khatianga sum sem policy ang kha chu sima kalsan tawh tur a nih lai a, kan sawrkar hrawn mek hian SEDP tiin, quid pro qua politics a kalpui ve leh a. An term chhungin an tiam zat an sem zawh vek theih loh tur thu leh hla awm te hi thu dik a nih chuan, thutiam hlen loh chu thu hran ni sela, an sem zawh vek loh tur chu sawrkar leh ram tan thil tha zawk a ni ang. SEDP program hian hlawtlinna chanchin (success story) a nei tha em tih thuah chuan, NLUP chanchin nen khan chutih te chiam chuan danglamna a awm a rinawm lo.
Kumin kum tawp lama inthlanna kan neih turah leh inthlanna lo awm zel turah pawh, political party ten sum sem quid pro qua politics leh quid pro qua politics dangte hi chu kalsan a hun tawh a ni. Quid pro qua politics khelh tawh lovin, politician ten Pathian tihna, dikna leh rinawmna te nunpui chunga kan State hi UC lem siam lohna leh eiruk awm lohna (zero corruption) State nih tir tumna election manifesto leh platform te min neipui zawk sela, ramin a thatpui zawk ang. Eirukna a awm loh chuan, hmasawnna chu a thleng chho zel mai ang. Sum sem quid pro qua politics leh quid pro qua politics dangte hi chu democracy puitling leh Kristian tamna Mizoram angah chuan thansan a hun tawh a ni. I thansan tawh ang u. Kan tan a tha ang. Kan inchhir lo ang. Political partyte tan pawh an sawrkar hunah quid pro qua phurritin a delh tawh hlawm lo ang a, an phur a zang sawt dawn a ni.
Chutichuan political party ten quid pro qua sum sem policy chu an flagship program atan hmang tawh hlawm lovin, eirukna do tur leh eiruknaa inhnamhnuaite chu dan anga hrem tur te; national leh international company ten investment an rawn nei theih dan kawng duang tur te; officerten hna tikhawtlai loa (bureaucratic red tapping awm loa) single window system hmanga a rang thei ang bera file leh hna tifel zung zung tur te; efficiency (tlinna leh tangkaina), proficiency (thiamna) leh sufficiency (intodelhna) ngai pawimawh tur te; hnathawh tha leh tlo (end product tha) nei tur te; khaw tina chhungkaw tinin khawlphetha leh tui connection tha nei vek tur te; damdawi in, school, college leh university changtlung leh tha nei tur te; mi pakhatin ram a nei thei zat ceiling siam tur te; restricted tender titawp tur te; chhungkaw laina induhsakna (nepotism) titawp tur te; compensation claim uchuak lutuk leh dik lote avanga ram hmasawna hna a tithuanawp dan leh a tikhawtlai thin te sutkian tum tur te; kalkawng tha, zau leh tlo nei tur te; ramngaw leh luite humhalhna chak taka kalpui tur te; drugs (heroin, meth, etc) dona kawnga chak taka hmala tur te; agriculture, horticulture leh sericulture tihmasawn dan tur te; hna nei lo (unemployment) problem sutkian dan tur te; income tax pek tawh tur te; sum enkawl thiam a, renchem tur te; thil pawimawh zawk leh ngaihtuah hmasak turte (priority) hriat tur leh ram hmasawnna project leh program dangah te min hruailuhpui zawk sela, puitlinna leh hmasawnna lam kan pan thei zawk a rinawm a ni.
“Hmathlir awm lohnaah chuan,
Mipui an boral thin a;
Dan zawmtu erawh chu,
A nihlawh thin.”
(Thufingte 29.18; ziaktu letling dan)