Transport Minister TJ Lalnuntluanga’n lirthei document fel lo leh driving license fel loten penalty chawi loa fee an pek theihna tur ‘khawngaihna hun’ an hawng leh dawn tih nimin khan chanchinbumite hmaah a puang.
A pisaa press conference a neihah Transport Minister Manuna chuan tun dinhmunah Mizoram pumah lirthei register 2,91,883 awmah document nung lo, chhiah ba lirthei 89,225 zet an awm tih a sawi a, driving licence 4,83,312 awmah renew ngai thahnem tak a awm tih a sawi bawk.
Manuna chuan a hun taka chhiah pe thei loten penalty chawi loa fee an pek theih nan August 16 atanga December 31, 2023 thleng khawngaihna hun hawn a ni leh dawn tih sawiin, hetiang hun hi hawn zen zen chi a ni loh avangin driving licence thi kawl emaw, lirthei document fel lo emaw kawlte chuan khawngaihna hun hi hmang tangkaia document tihfel ngai tifel vek turin an ngen tih a sawi.
Transport minister chuan chhiah pek loh avanga lirthei document thite leh driving licence nung lo chunga lirthei khalhte hi danin a khap tlat bakah a him lo a, accident tawh palhin insurance policy la dam mah se, accident claim a theih loh a, mi tam takin harsatna an tawk mek tih a sawi.
Chhiah bat awm zawng zawngte hi pek vek ni ta se Mizoram sorkarin hmasawnna hna eng emaw zat a kalpui thei dawn tih sawiin, A.G. Office atanga auditor-ten lirthei neitute chhiah pek loh avanga transport department-in audit para an neih thinte chu a bo vek dawn tih a sawi bawk a ni.